როგორც იცით, ქართული ოცნების დეპუტატმა, გუგული მაღრაძემ ჭარბი წონის რეგულირების შესახებ ინიციატივა გამოთქვა, რამაც საზოგადოებაში არაერთგვაროვანი რეაქცია გამოიწვია. მადა ჭამაში მოდის და რაკი რეგულაციების თემას მივადექით, გთავაზობთ კიდევ 5 რამეს, რაც სახელმწიფომ აუცილებლად უნდა დაარეგულიროს.

1. ბევრი ყავის სმა

ფოტო: italiangoodnews.com

ყველამ იცის, რომ ბევრი ყავის სმა გულის აჩქარებასა და წნევის აწევას იწვევს. თუ თქვენ ხედავთ, რომ თქვენი თანამშრომელი, მეგობარი ან ოჯახის წევრი დღის განმავლობაში 3-4 ჭიქა ყავას სვამს, უფლება უნდა გქონდეთ, კონკრეტულ ნომერზე დარეკოთ და ეს საზიანო აქტი აღკვეთოთ.

2. ჟაკეტის გარეშე გარეთ გასვლა

ამ რეგულაციის დაწესებას უკვე მრავალი წელია ითხოვენ დედები. ვფიქრობთ, ახლა კარგი დროა იმისთვის, რომ ეს მნიშვნელოვანი საკითხი დღის წესრიგში დადგეს.

3. სერიალის მთელი სეზონის ერთ ჯერზე ყურება

ფოტო: Shutterstock

თუ ადამიანს არ ჰყოფნის შეგნება, რომ საყვარელი სერიალი "გამოიზოგოს", ამაში აუცილებლად უნდა ჩაერთოს სახელმწიფო და ლიმიტი დააწესოს ერთ ჯერზე ნანახი სერიების რაოდენობაზე. ყველასთვის ცნობილია, რომ ზოგიერთი სერიალის ყურებამ შეყოლა იცის და შედეგად, შეიძლება მნიშვნელოვანი საქმეები გაგვიფუჭდეს.

4. ღამის თენებები

ფოტო: Getty Images

სახელმწიფო ყველანაირად უნდა ეცადოს, რომ ადამიანებმა დროულად დაიძინონ და შესაბამისად, მეორე დღეს, მეტი ენერგიით დაიწყონ დილა. ამ ეგიდით შეიძლება ქალაქის განათების გამორთვა 10 საათის შემდეგ. კარგი იქნება, თუ ისეთ ფილმებზე, როგორებიცაა "უძინარი სიეტლში" და "მებრძოლთა კლუბი", დაწესდება შეზღუდვები.

5. სასმელების არევა

ფოტო: Christian Draghici / Shutterstock

ბევრ ჩვენგანს საკუთარ თავზე გამოუცდია, რა შედეგები შეიძლება მოჰყვეს სასმელების არევას. კარგი იქნება, თუ დაწესებულებები თავად გააკონტროლებენ, რომ მათმა სტუმრებმა ერთმანეთში არ აურიონ ღვინო, არაყი და ლუდი, რითაც თავიდან ავიცილებთ მტანჯველ ნაბახუსევს.