პრეზიდენტ გიორგი მარგველაშვილის განცხადებით, სისხლის სამართლებრივი დევნის ორგანოებში არ იცვლებიან ის პირები, რომლებიც ძალადობდნენ. მისივე თქმით, სწორედ ამიტომ ვერ ექნება მას გახმაურებული საქმეების სამართლიანად გამოძიების იმედი. ამის შესახებ პრეზიდენტმა დღეს, 2 მაისს, პარლამენტში ყოველწლიური მოხსენებისას ისაუბრა:

"რანაირად უნდა მქონდეს იმედი, რომ გამოიძიებენ და სამართლიანად იქნება საზოგადოებისთვის მიწოდებული, პრეზიდენტ ზვიად გამსახურდიას საქმე, ზურაბ ჟვანიას საქმე, რაფალიანცის საქმე, მუხტარლის საქმე, ჩვენი მიზანი და მისია და ეს მანდატი გვქონდა, როდესაც ვცლიდით ხელისუფლებას, რომ ეს ძალადობა შეცვლილიყო".

მარგველაშვილის თქმით, არათუ საფუძველი ჩაეყარა სასამართლო სისტემის რეფორმას, არამედ რეალური რეფორმა უვადოდ გადაიდო:

"სასამართლო სისტემა მართლა რთულია რეფორმისთვის, ამას ერთ დღეში ვერ გააკეთებ, სწორიც იქნებოდა, რომ არ გვქონოდა ამის ამბიცია, მაგრამ საფუძვლის ჩაყრა სისტემის ცვლილებებისთვის ჩვენი საერთო ვალდებულება იყო, ჩვენ რა ვუქენით ამ ვალდებულებას იმ პროცესებით და დანიშვნებით, რომელიც წარვმართეთ? უვადოდ გადავდეთ".