სომხეთში მმართველი რესპუბლიკური პარტია პრემიერ-მინისტრობის კანდიდატს არ წარადგენს. ამის შესახებ განცხადება პარტიის პრესსპიკერმა, ედუარდ შარმაზანოვმა გააკეთა.

"ვის დავუჭერთ მხარს იმაზე იქნება დამოკიდებული, თუ ვინ იქნებიან კანდიდატები და რა პროგრამით წარსდგებიან", - განაცხადა შარმაზანოვმა.

პარტიის განცხადებაზე პაშინიანმა თქვა, რომ "ეს არაა ცუდი, მაგრამ არც კარგია".

"კარგი იქნებოდა, თუ რესპუბლიკური პარტია განაცხადებდა, რომ სხვა ფრაქციებთან ერთად პრემიერობის "სახალხო კანდიდატს" დაუჭერდა მხარს", - განაცხადა პაშინიანმა.

მან, ასევე, დაამატა, რომ ის მზადაა რესპუბლიკური პარტიის ფრაქციას შეხვდეს და აუხსნას, რომ "სახალხო კანდიდატის" მხარდაჭერით, ისინი გამარჯვებას ხალხს გაუზიარებენ.

"სხვა შემთხვევაში, ის დეპუტატები, რომლებიც "სახალხო კანდიდატს" მხარს არ დაუჭერენ სომხურ პოლიტიკაში ადგილი არ აქვთ", - თქვა პაშინიანმა.

სომხეთში ახალ პრემიერ-მინისტრს პარლამენტი პირველ მაისს აირჩევს. ფრაქცია ელკმა განაცხადა, რომ კანდიდატად ნიკოლ პაშინიანს წარადგენს. სხვა ფრაქციებს ჯერ დაზუსტებული არ აქვთ.

ყოფილი პრემიერ-მინისტრი სერჟ სარგსიანი თანამდებობიდან 23 აპრილს, 11-დღიანი საპროტესტო აქციების შემდეგ გადადგა. ამის შემდგე პრემიერ-მინისტრის მოვალეობის შემსრულებელი კარენ კარაპეტიანი გახდა.

გაიგეთ მეტი: