თბილისის მერიის მიერ 21 თებერვალს შექმნილი საზოგადოებასთან კომუნიკაციის განვითარების სააგენტოს მიმდინარე წლის ბიუჯეტი 1 339 174 ლარია. ამ სააგენტოში ჯამში 40 ადამიანია დასაქმებული და მათი ჯამური ანაზღაურება 80 250 ლარია. ამის შესახებ On.ge-ს თბილისის მერიის საჯარო ინფორმაციის გაცემაზე პასუხისმგებელმა პირმა აცნობა.

როგორც თბილისის მერიის 2018 წლის 28 თებერვლის განკარგულებიდან ირკვევა უწყების "საზოგადოებისთვის მნიშვნელოვანი ინფორმაციის გავრცელებისთვის" მიმდინარე წელს გათვალისწინებლია 1 817 800 ლარი. აქედან თითქმის ნახევარი მილიონი (478 626 ლარი) მერიის ადმინისტრაციის ხარჯია, დანარჩენი კი თბილისის მერიის კომუნიკაციის სააგენტოს ბიუჯეტი.

კომუნიკაციების სააგენტოს მიერ დაგეგმილი ან განხორციელებული პროექტების ღირებულება ამ ეტაპისთვის 915 952 ლარს უტოლდება.

კამპანია

  • კამპანია გაუფრთხილდი ქალაქს - 600 000 ლარი.

რეკლამა

  • ფეისბუქი - $55 000, დაახლოებით 132 203 ლარი;
  • იმედი - 152 821 ლარი;
  • TV პირველი - 11 676 ლარი;
  • საზოგადოებრივი მაუწყებელი - 8 060 ლარი;
  • TV იბერია - 4 758 ლარი;
  • მიკროავტობუსებში რეკლამა - 4 523 ლარი;
  • მაესტრო - 1 911 ლარი.

ბოლო წლების განმავლობაში რეიტინგებით პირველ ორეულში მყოფ რუსთავი 2-თან სარეკლამო ხელშეკრულება არ დადებულა. შესაბამისი ხელშკრულება არ იძებნება შესყიდვების სააგენტოზე და იმავეს ამბობს ტელეკომპანიის წარმომდგენელი.

სააგენტოს ფუნქცია და მოვალეობა

როგორც მერიაში On.ge-ს განუმარტეს სააგენტო თბილისის მუნიციპალიტეტის მერიის სისტემის ყველა სტრუქტურული ერთეულის საზოგადოებასთან კომუნიკაციისა და მასთან დაკავშირებული უფლებამოსილებების განმახორციელებელი, ცენტრალიზებული დაწესებულებაა. სააგენტოს ფუნქციაა სტრატეგიის შემუშავება, პიარაქტივობებისა და ღონისძიებების დაგეგმვა და განხორციელება, სარეკლამო და საინფორმაციო კამპანიის წარმოება.

თბილისის მერიის პრესსამსახურში On.ge-ს განუცხადეს, რომ სააგენტომ გააერთიანა თბილისის მერიისა და მიისი დაქვემდებარებეული უწყებების პრესსამსახურები. რიგ შემთხვევაში დაიზოგა ხარჯები, შემცირდა თანამშრომლების რაოდენობა და მათი ანაზღაურება.