პაკისტანელი ვიდეო ბლოგერი ქანდილ ბალოხი, რომელიც სოციალურ მედიაში, პაკისტანური კულტურისთვის სკანდალური ვიდეოებისა და ფოტოების გავრცელებით იყო ცნობილი, საკუთარმა ძმამ მოკლა.

ქანდილი მუდმივად იყო კონსერვატორების სიძულვილის სამიზნე და მის წინააღმდეგ ხშირად გამოდიოდნენ რელიგიური ფუნდამენტალიზმით გაჯერებული და მიზოგინიური განცხადებებით.

ლიბერალურად განწყობილ ახალგაზრდებში მას ბევრი თაყვანისმცემელი და თანამოაზრე ჰყავდა.

ქანდილ ბალოხი პოპულარული 2014 წელს გახდა, მას შემდეგ, რაც Facebook-ზე თავისი ვიდეო ატვირთა, რომელშიც მომხმარებლებს ეკითხებოდა კარგად გამოიყურებოდა თუ არა.

ბოლო წლების განმავლობაში ის ხშირად წერდა ვიდეო პოსტებს პაკისტანში არსებულ პრობლემებზე და ფუნდამენტალისტური იდეოლოგიის წინააღმდეგ ილაშქრებდა.

ბოლო სკანდალური ფოტო, რომელიც, სავარაუდოდ, მისი მკვლელობის მოტივი გახდა, ქანდილმა 20 ივნისს გამოაქვეყნა.

ფოტო: Qandeel Baloch

ამ ფოტოებში ბლოგერი ერთერთ რელიგიურ მსახურთან, მუფთი ქავსთან ერთადაა გადაღებული.

პოლიციის ინფორმაციით, ქანდილი თავისმა ძმამ დაახრჩო, რის შემდეგაც დამნაშავე ადგილიდან მიიმალა და აქამდე დაკავებული არ არის.

ბლოგერის მკვლელობა ე.წ. ღირსების მკვლელობაა.

პაკისტანში, ყოველწლიურად, ასობით ქალს კლავენ ე.წ. ღირსების მკვლელობის მოტივით.