ხორავას ქუჩაზე არასრულწლოვნების მკვლელობაში ერთ-ერთი ბრალდებულის ოჯახის მოწვევით ბრიტანელი კრიმინალისტები თბილისში ჩამოვიდნენ. კრიმინალისტები ალტერნატიულ ექსპერტიზას ნივთიერი მტკიცებულებების გაცნობის შემდეგ ჩაატარებენ.

"ჩვენი მხრიდან არის მონდომება, რომ ყველაფერი გამჭვირვალედ და ობიექტურად წარიმართოს. ამ დრომდე, ნივთიერი მტკიცებულებები არ იყო ხელმისაწვდომი და ვერ გავეცანით. თუმცა ვიმედოვნებთ, ეს დროულად მოხდება. მტკიცებულებებს გავეცნობით და დავიწყებთ მუშაობას. მე ყოველთვის დამოუკიდებელი და მიუკერძოებელი ვარ ჩემ საქმეში", – ბრიტანელი ექსპერტის ჯეისონ პეინის კომენტარის თარგმანს პირველი არხი ავრცელებს.

პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად მოკლეს ორი მოზარდი. ლევან დადუნაშვილი საავადმყოფოში მიყვანამდე გარდაიცვალა. დავით სარალიძეს საავადმყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა. მკვლელობის ბრალდება ორ არასრულწლოვანს წაუყენეს. ორივე მათგანი დაკავებულია.

პროკურატურამ სასამართლოში სახელმწიფო კომპლექსური ექსპერტიზის დასკვნა რამდენიმე დღის წინ წარადგინა. საპროცესო კოდექსის მიხედვით, ალტერნატიული ექსპერტიზისთვის საექსპერტო მასალა მხარეებს მხოლოდ ამის შემდეგ გადაეცემა.