სომხეთის ყოფილმა პრეზიდენტმა და ახლდარაჩეულმა პრემიერ-მინისტრმა, სერჟ სარგსიანმა, მის წინააღმდეგ გამართული საპროტესტო აქციების მე-11 დღეს თანამდებობა დატოვა. გადადგომის შესახებ განცხადება მის ოფიციალურ გვერდზე გამოქვეყნდა.

სარგსიანის განცხადების ტექსტი

"ძვირფასო თანამოქალაქეებო,

მივმართავ სომხეთის რესპუბლიკის ყველა მოქალაქეს, უფროსებს და ჩემს საყვარელ ახალგაზრდებს, ქალებსა და კაცებს;

მივმართავ მათ, ვინც დღე და ღამე ქუჩაში იდგა მოწოდებით "უარყავი სერჟი" და მათ, ვინც ეს დღეები დაბრკოლებებით მიდიოდა სამსახურშ, რომ საკუთარი მოვალეობა შეესრულებინა.

მივმართავ მათ, ვინც ციხეში იჯდა მთელი დღეები და ღამეები და მათ ვინც დღე და ღამე უსაფრთხოებას უზრუნველყოფდა;

მივმართავ ჩვენს მამაც ჯარისკაცებსა და ოფიცრებს, რომლებიც საზღვარს იცავენ;

მივმართავ მეგობრებს, ყველა პოლიტიკურ ძალას და პოლიტიკოსს;

როგორც ქვეყნის მმართველმა უკანასკნელად გამოვეცი განცხადება.

ნიკოლ პაშინიანი მართალი იყო, მე ვცდებოდი. შექმნილი სიტუაციას რამდენიმე გამოსავალი აქვს, მაგრამ არცერთ მათგანს არ ავირჩევ. ეს ჩემი არ არის. მე ვტოვებ პრემიერ-მინისტრის პოსტს."

ერევანში 13 აპრილიდან საპროტესტო აქციები მიმდინარეობს. ქალაქის ქუჩებში ათასობით ადამიანი სერჟ სარგსიანის გადადგომას ითხოვდა. წყლის ჭავლის, ხელკეტების, მავთულხლართების, ხმოვანი ყუმბარების და ასეულობით დაკავებულის მიუხედავად პროტესტი სარგსიანის გადადგომამდე არ შეწყდა. ამ წუთებში ერევნის ქუჩებში მოსახლეობა მის გადადგომას აღნიშნავს.