პერსონალურ მონაცემთა დაცვის ინსპექტორის, თამარ ქალდანის განცხადებით, ძალადობის ამსახველი ვიდეომასალის ტირაჟირება დაუშვებელია. ქალდანი სოციალური ქსელით არასრულწლოვანზე ძალადობის ამსახველ ვიდეოს გამოეხმაურა.

"ვიდეომასალაში, რომელიც შეიცავს ძალადობისა და ბულინგის ფაქტებს, სრულად შესაძლებელია ბავშვის იდენტიფიცირება, რაც ხელყოფს მის პატივსა და ღირსებას, პირადი ცხოვრების ხელშეუხებლობას და კიდევ უფრო მეტ ზიანს აყენებს მის ინტერესებს", - ნათქვამია განცხადებაში.

ინსპექტორი ამბობს, რომ მსგავსი ვიდეოს გავრცელების შემთხვევაში მომხმარებელმა არ უნდა გადააზიაროს ის, არამედ აცნობოს შესაბამის ორგანოებს, მათ შორის, ინსპექტორის აპარატს.

შინაგან საქმეთა სამინისტრომ ბავშვზე ძალადობის ამსახველ ვიდეოზე გამოძიება დაიწყო. ვიდეომასალაში ჩანს როგორ აიძულებენ ბავშვები ბავშვს სავარაუდო სექსუალური კავშირის შესახებ ისაუბროს.

საქართველოს სოციალური მომსახურების სააგენტოს ინფორმაციით, ძალადობის მსხვერპლ ბავშვთან და ოჯახთან უკვე ვმუშაობთ.