საქართველოს მთავრობის გადასაწყვეტია, რას გამოიყენებს მტკიცებულებად რუსთავი 2-ის წინააღმდეგ - ასე გამოეხმაურა On.ge-სთან საუბრისას აკაკი გოგიჩაიშვილი რუსთავი 2-ის საქმეზე საქართველოს მთავრობის მიერ მისი განცხადებების გამოყენებას.

"მე რომ დავის მხარე ვიყო, რა თქმა უნდა, გამოვიყენებდი ყველა მტკიცებულებას, რაც ჩემს ხელში იქნებოდა. სიმართლე ყველა ფასეულობაზე მაღლა დგას. ჩემი ნათქვამი უკავშირდება სიმართლეს და თუ ამას მთავრობა თავის არგუმენტად გამოიყენებს მისი ნებაა", - განაცხადა აკაკი გოგიჩაიშვილმა.

ტელეკომპანია რუსთავი 2-ის იურისტის, თამთა მურადაშვილის თქმით, იუსტიციის სამინისტრომ ევროსასამართლოსგან ტელეკომპანიის წილების გასხვისებაზე შეზღუდვის მოხსნა ითხოვა.

რუსთავი 2-ის საქმე

2017 წლის 3 მარტს სტრასბურგის ადამიანის უფლებათა ევროპულმა სასამართლომ რუსთავი 2-ის საქმეზე უზენაესი სასამართლოს მეირ გამოტანილი გადაწყვეტილების აღსრულება შეაჩერა. წინა დღეს, 2 მარტს საქართველოს უზენაესი სასამართლოს დიდმა პალატამ რუსთავი 2-ის 100 პროცენტი ქიბარ ხალვაშს მიაკუთვნა.

დეკემბერში სასამართლომ რუსთავი 2-ისა და მისი მფლობელების საქმის დასაშვებობაზე მსჯელობა დაიწყო. სტრასბურგის სასამართლო თითოეულ მომჩივანთან დაკავშირებით საქართველოს მთავრობას კითხვებს უსვამდა.

იუსტიციის სამინისტროს ცნობით, საქმეზე საკუთარი პოზიცია საქართველოს მთავრობამ სტრასბურგის სასამართლოს 28 მარტს წარუდგინა.

რუსთავი 2-ის საქმის შესახებ მეტი გაიგეთ აქ.