საქართველოს პრემიერ მინისტრმა, გიორგი კვირიკაშვილმა სომხეთის ყოფილ პრეზიდენტს, სერჟ სარგსიანს პრემიერად დანიშვნა მიულოცა.

"ვულოცავ ჩემს ძვირფას მეგობარს, სერჟ სარგსიანს სომხეთის პრემიერ-მინისტრად დანიშვნას. ურთიერთობის გაღრმავებასა და ჩვენს ქვეყნებს შორის მეგობრობის გამტკიცებას ველით", - წერს ტვიტერზე გიორგი კვირიკაშვილი.

საპროტესტო აქციების მიუხედავად სომხეთის პარლამენტმა სერჟ სარგსიანი ქვეყნის პრემიერად აირჩია.

სარგსიანის კანდიდატურას ერევანში რამდენიმედღიანი საპროტესტო აქცია მოჰყვა. მანიფესტაცია სომხეთში 13 აპრილს სარგსიანის მიერ როლის შეცვლის და პრეზიდენტიდან პრემიერ-მინისტრის პოსტზე გადასვლის გაპროტესტებით დაიწყო. დემონსტრანტები ერევნის ქუჩებში არჩევიდან მეორე დღესაც ქუჩაში არიან გამოსულები.

სარგსიანი პრეზიდენტად 2008 წელს აირჩიეს. ის ქვეყანას ორი ვადის განმავლობაში მართავდა და თანამდებობა 9 აპრილს დატოვა.

2015 წელს რეფერენდუმის შემდეგ პრეზიდენტის ძალაუფლების უმეტესი ნაწილი პრემიერ-მინისტრს გადაეცა, რომელსაც პარლამენტი ირჩევს. პარლამენტი ირჩევს ასევე პრეზიდენტსაც, რომელსაც საკონსტიტუციო ცვლილებების შედეგად სიმბოლური როლი აქვს. 9 აპრილს პრეზიდენტის პოსტზე სერჟს სარგსიანის პოლიტიკური მოკავშირე არმენ სარქისიანი დაამტკიცეს.

ერევნის ქუჩებში გამოსული მომიტინგეები ამბობენ, რომ არაძალადობრივ "ხავერდოვან რევოლუციას" იწყებენ.