საფრანგეთში საქართველოს ელჩის, ეკატერინე სირაძე-დელონეს განმარტებით, ამ დრომდე ნიცაში მომხდარი ტერაქტის შედეგად გარდაცვლილთა და დაშავებულთა შორის ქართველები არ ირიცხებიან. მისი თქმით, საელჩო იქ მცხოვრებ ყველა ქართველს უკავშირდება იმისთვის, რომ გაიგონ, ხომ არ დაშავდა რომელიმე ტერაქტის შედეგად.

თუმცა, მან ასევე აღნიშნა, რომ საელჩოში შევიდა ინფორმაცია იმის შესახებ, რომ 4 ქართველს, მაგრამ არა საქართველოს მოქალაქეს ეძებენ, რომელსაც ახლობლები ამ დრომდე ვერ უკავშირდებიან:

"ისინი მუდმივად ცხოვრობენ ლიონში და გუშინ იმყოფებოდნენ ნიცაში და არიან ერთი ოჯახის წევრები. თუმცა, რადგან ჯერ კიდევ ბევრი გარდაცვლილი არის ამოსაცნობი, მემგონი, სანამ აბსოლუტურად ყველა დაღუპულს არ ამოიცნობენ, მანამდე დაზუსტებულად ვერ ვიტყვით, რომ საქართველოს მოქალაქეები არ არიან დაღუპულთა და დაშავებულთა შორის".

გარდა ამისა, ნიცაში მომხდარ ტერაქტთან დაკავშირებით საფრანგეთში საქართველოს საელჩო საგანგებო განცხადებასაც ავრცელებს:

"საქართველოს მოქალაქეთა საყურადღებოდ! დღეს, 14 ივლისს, ქალაქ ნიცაში მომხდარ ტერორისტულ აქტთან დაკავშირებით, შეგახსენებთ საელჩოში მოქმედი ცხელი ხაზის ნომერს +33 7 83 31 86 89. ასევე გთხოვთ, გვაცნობოთ თუ ფლობთ ინფორმაციას დაზარალებული საქართველოს მოქალაქეების შესახებ".

საფრანგეთის ქალაქ ნიცაში, ბასტილიის დღის აღსანიშნავად შეკრებილ ათეულობით ერთად შეკრებილ ადამიანს სატვირთო მანქანა დაეჯახა. თვითმხილველები ამბობენ, რომ სროლის ხმაც გაიგეს, მაგრამ სატვირთოს მანქანის მძღოლი არ დაუნახავთ. ერთ-ერთმა მათგანმა Associated Press-ს განუცხადა, რომ სატვირთოს მძღოლი გადმოვიდა მანქანიდან და ცეცხლი გახსნა.

BBC-ის ინფორმაციით, ტერაქტის შედეგად დაღუპულთა რაოდენობა ამ დროისთვის 84-ია, მათ შორის გადრაცვლილები არიან ბავშვებიც.