აფხაზეთის დე ფაქტო თავდაცვის სამინისტრო აშშ-სა და მოკავშირეების მიერ სირიის დაბომბვას გმობს. ინფორმაციას ადგილობრივი გამოცემა Apsnypress ავრცელებს.

"ჩვენ ვგმობთ ამ ინციდენტს და მას ომის წამოწყების პროვოკაციად განვიხილავთ", - ნათქვამია განცხადებაში.

განცხადებაში, ასევე, ნათქვამია, რომ აფხაზეთის დე ფაქტო სამხედრო ძალები მზად არის დაიცვას სირიელი ხალხი და დახმარება გაუწიოს მათ:

"კოალიცია, ამერიკის შეერთებული შტატებით სათავეში, სირიაში დესტაბილიზაციის მცდელობებს არ წყვეტს, რათა ის კონტროლის ქვეშ მოიქციოს".

აშშ-ს, ბრიტანეთისა და საფრანგეთის ავიაციამ სირიის სამთავრობო ბაზები 14 აპრილს, გვიან ღამით დაბომბა. მთავარი სამიზნე დამასკოში არსებული სამეცნიერო-კვლევითი ცენტრი იყო.

აშშ მოკავშირეებთან ერთად ასადის რეჟიმს მშვიდობიანი მოსახლეობის წინააღმდეგ ქიმიური იარაღის გამოყენებაში ადანაშაულებს. სირიის პრეზიდენტი ბაშარ ალ-ასადი ბრალდებებს უარყოფს.

სირიის სამთავრობო ძალების მხრიდან ქალაქ დუმაში განხორციელებული, ქიმიური შეტევის შედეგად 70 ადამიანი დაიღუპა, ხოლო დაახლოებით 500 საავადმყოფოებში ქიმიური ინტოქსიკაციის ნიშნებით მოხვდა. ქიმიური იარაღის გამოყენების ფაქტი დაადასტურა ჯანდაცვის მსოფლიო ორგანიზაციამაც.

გაიგეთ მეტი: