ჰაკერებს წვდომა ჰქონდათ ამერიკის სამხედრო თვითმფრინავებზეც.

ფოტო: Getty

ჩინელი ბიზნესმენი, რომელიც ამერიკის სასამართლომ საიდუმლო სამხედრო ინფორმაციის უკანონოდ მოპოვებაში დამნაშავედ სცნო, ციხეში 4 წელს გაატარებს. ინფორმაციას BBC ავრცელებს.

სიუ ბინი თანამშრომლობდა ჩინეთის სამხედრო ჰაკერებთან, რის შედეგადაც ის 2008 წლიდან 2014 წლამდე აშშ-ს თავდაცვის ინსტიტუტებიდან ინფორმაციას იპარავდა.

ბინი 2014 წელს კანადაში დააკავეს და ამერიკას გადასცეს.

ჩინეთის მთავრობამ ბიზნესმენთან კავშირი უარყო და განაცხადა, რომ უცხოური კომპანიების და მთავრობის ინსტიტუტებიდან ინფორმაციის უკანონოდ მოპოვებასთან კავშირი არ აქვს.

46 თვიანი პატიმრობის გარდა, ლოს-ანჯელესის სასამართლომ სიუ ბინს 10 000 აშშ დოლარის გადახდა დააკისრა.

მსჯავრდებული დანაშაულს აღიარებს. მას ასევე ბრალად ედება მოპარული ინფორმაციის ჩინურ ენაზე თარგმნა.

2015 წელს ჩინეთში დააკავეს ჯგუფი, რომლებიც აშშ-ს მთავრობის ინფორმაციით, ამერიკის მნიშვნელოვანი კვლევების შესახებ ინფორმაციას იპარავდნენ.