YouTube-ს ბავშვების მონაცემების უკანონო შეგროვების ბრალდებით აშშ-ს ფედერალური სავაჭრო კომისიაში უჩივიან და სანქციების დაკისრებას ითხოვენ. საჩივარი ბავშვთა უფლებების დამცველმა 23-მა ორგანიზაციამ დაწერა. ამის შესახებ The Guardian წერს.

განმცხადებლები მიიჩნევენ, რომ YouTube-ის გაცხადებული პოლიტიკის მიუხედავად, რომლის მიხედვითაც მისი მომხმარებელი მხოლოდ 13 წელს გადაცილებული ადამიანები არიან, Google კანონდარღვევით აგროვებს ქვედა ასაკობრივი ჯგუფის მონაცემებს. კოალიცია აღნიშნავს, რომ ისეთი ინფორმაციის შეგროვებას, როგორიცაა ადგილმდებარეობა, მოწყობილობის იდენტიფიცირება, ტელეფონის ნომრები, აშშ-ს ბავშვთა ონლაინკონფიდენციალურობის აქტით (Coppa), მშობლის ნებართვა სჭირდება.

"ბავშვებისთვის რეკლამის შეთავაზებით Google-ის მოგება იზრდება, რაც ბავშვთა დაცვის აქტით დაუშვებელია", - აღნიშნავს ბავშთა კომერციული ინტერესებისგან გათავისუფლების ჯგუფის (CCFC) აღმასრულებელი დირექტორი ჯოშ გოლინი.

ჯგუფი აღნიშნავს, რომ YouTube ბავშვებში ყველაზე პოპულარული ონლაინპლატფორმაა და მას 6-დან 12 წლამდე ბავშვების 80 პროცენტი იყენებს. მათი განმარტებით, Google-მა 2015 წელს გააკეთა საბავშვო აპლიკაციაც, რომელიც რელევანტურ რეკლამებს სთავაზობს მცირეწლოვან მაყურებლებს.

"Facebook-ის მსგავსად, Google-მა თავისი უზარმაზარი რესურსები კონფიდენციალურობის დაცვის ნაცვლად მოგებას მოახმარა", - აღნიშნავენ ჯგუფში.

მომხმარებელთა კავშირის პოლიტიკურმა მრჩეველმა ქეთი მუკინნიმ თქვა, რომ YouTube-მა იცის, რა შინაარსის ვიდეოებს უყურებენ ბავშვები და მათთვის ქმნის შესაბამის არხებს და ინფორმაციის მისაღებად მშობლების თანხმობა საჭირო არაა.

YouTube-ის წარმომადგენელის განცხადებით, მიუხედავად იმისა, რომ ბავშვთა უფლებების დარღვევაზე საჩივრები არ მიუღიათ, მათთვის ეს საკითხი პრიორიტეტულია.

"საფუძვლიანად ვეცნობით საჩივრის შინაარსს და ვფიქრობთ, რისი გამოსწორება შეიძლება", - დასძინა კომპანიის წარმომადგენელმა.