საფრანგეთში რკინიგზელები ორდღიან გაფიცვას აწყობენ, რომელიც 3 აპრილს დაიწყო. ამის გამო გაუქმდა მაღალსიჩქარიანი TGV მატარებლების რეისების 87 პროცენტი და რეგიონული რეისების 80 პროცენტი. ასევე, Eurostar-ის მატერებლების განრიგი დაირღვა.

გაფიცვა ოთხმა პროფკავშირმა გამოაცხადა. ისინი სახელმწიფო რკინიგზის კომპანიის, SNCF-ის რეფორმას ეწინააღმდეგებიან. აქციის მონაწილეები შიშობენ, რომ რეფორმის შედეგად, კომპანია გაიყიდება. ამას მთავრობა უარყოფს.

რკინიგზელების ორდღიანი გაფიცვა ივნისის ბოლომდე, ყოველ ხუთ დღეში ერთხელ გაიმართება. შემდეგი აქცია 8-9 აპრილს იგეგმება.

გაფიცვის გამო, დარჩენილი მატარებლები გადატვირთულია. ემანუელ მაკრონის ხელისუფლებაში მოსვლის შემდეგ ეს პირველი მასშტაბური საპროტესტო აქციაა.