ბოლო ათი დღეა საქართველოში ქალები სექსუალური შევიწროებაზე ალაპარაკდნენ და საჯარო პირებს ადანაშაულებენ. არასამთავრობო ორგანიზაცია სიდას ხელმძღვანელის, ზვიად დევდარიანის შემდეგ სექსუალურ შევიწროებაში საჯარო რეესტრის ხელმძღვანელი, პაპუნა უგრეხელიძე დაადანაშაულეს.

პაპუნა უგრეხელიძის წინააღმდეგ არა მხოლოდ დაზარალებული ქალის ისტორია, არამედ ომბუდსმენის დასკვნაც არსებობს. ასევე საქართველოს ახალგაზრდა იურისტთა ასოციაციას აქვს რამდენიმე ქალის საქმე, რომელიც პაპუნა უგრეხელიძეს სექსუალურ შევიწროებასა და მუქარაში ადანაშაულებს. დავა სასამართლოში მიმდინარეობს.

On.ge დაინტერესდა პარლამენტარების პოზიციით და მათ უგრეხელიძის საქმესთან დაკავშირებით ესაუბრა.

საპარლამენტო უმრავლესობის დეპუტატებს ერთი პოზიცია აქვთ. ისინი მიიჩნევენ, რომ პაპუნა უგრეხელიძის მიმართ ბრალდებები შესაბამისმა უწყებებმა უნდა გამოიძიონ. კითხვაზე, რატომ არ არის საკმარისი ომბუდსმენის დასკვნა იმისთვის, რომ პაპუნა უგრეხელიძის ბრალეულობა დამტკიცდეს, პასუხობენ, რომ დასკვნა საჯარო დოკუმენტი არ არის და არ იციან, რა წერია ტექსტში.

"ამ ფაქტებს დადასტურება სჭირდება. არ მაქვს ინფორმაცია ეს ფაქტები რეალურია თუ არა. სახალხო დამცველის დასკვნას არ გავცნობივარ, თუ ასეთი ფაქტი დადასტურდა, ამის გამართლება არ შეიძლება და შესაბამისი რეაგირება უნდა მოჰყვეს", - უთხრა On.ge-ს გიორგი კახიანმა, ქართული ოცნების წევრმა.

ამავე პარტიის კიდევ ერთი წევრი, გია ვოლსკი მიიჩნევს, რომ საკითხზე მსჯელობისთვის ორივე მხარის მოსმენაა საჭირო.

"წინასწარ დასკვნების გაკეთება საზოგადოებისთვის და კონკრეტულად ბრალდების ობიექტისთვის სტრესის შემცველია. თუ ადამიანი მით უფრო მამაკაცი კადრულობს ისეთ რამეს, რასაც აბრალებენ, მაშინ ვფიქრობ არა მარტო საზოგადოებრივი გაკიცხვა და მორალური პასუხისმგებლობა, არამედ ამ საკითხთან დაკავშირებით ადმინისტრაციული ზომებიც უნდა იყოს მიღებული", - აღნიშნავს ვოლსკი.

ნაციონალური მოძრაობის დეპუტატი რომან გოცირიძე პაპუნა უგრეხელიძის საქმესთან დაკავშირებით არ საუბრობს, რადგან ამბობს, რომ შემთხვევას არ იცნობს.

"საკმარისი ინფორმაცია არ მაქვს და ამ კონტექსტში კომენტარს ვერ გავაკეთებ", - განუცხადა On.ge-ს რომან გოცირიძემ.

On.ge სექსუალურ შევიწროვებასთან დაკავშირებით, პატრიოტთა ალიანსის პოზიციის მოსმენასაც შეეცადა, თუმცა პარტიის წარმომადგენლებთან დაკავშირება ვერ შევძელით. მათ ჩვენს ზარებს არ უპასუხეს. ასევე დეპუტატები არ ესწრებოდნენ ბიუროს სხდომას და არც პარლამენტში იმყოფებოდნენ.

პარტია ევროპული საქართველოს დეპუტატის ელენე ხოშტარიას თქმით, დაუშვებელია სექსუალურ შევიწროებაში დადანაშაულებულ პირებს სახელმწიფომ ხელი დააფაროს. დეპუტატის თქმით, სახელმწიფო უნდა დაეხმაროს ძალადობასა და სექსუალური შევიწროების მსხვერპლ ქალებს, დაიცვან საკუთარი უფლებები.

"ფაქტია, რომ ამ შემთხვევაში არსებობდა ომბუდსმენის დასკვნა და მაღალი თანამდებობის პირები იყვნენ საქმის კურსში და არანაირი რეაგირება არ მოხდა. დაუშვებელია, რომ ხელს აფარებდნენ თავის თანამშრომელს, ვინც არ უნდა იყოს ის. ამ ყველაფერს სამართლებრივი რეაგირება სჭირდება", - დასძენს ხოშტარია.

მას შემდეგ, რაც ქალები სექსუალურ შევიწროებაზე საჯაროდ ალაპარაკდნენ, ევროპულმა საქართველომ ქალთა სექსუალური შევიწროების შესახებ კანონპროექტზე მუშაობა დაიწყო.

ამ საკითხზე პარტიის წარმომადგენლები ქალთა უფლებებზე მომუშავე არასამთავრობო ორგანიზაციების წარმომადგენლებს შეხვდნენ.

შეხვედრაზე განიხილეს საჯარო რეესტრის ხელმძღვანელის, პაპუნა უგრეხელიძის მიმართ ყოფილი თანამშრომლის მიერ სექსუალურ შევიწროებაზე გამოთქმული ბრალდებებიც.