პარლამენტის დეპუტატმა, ზაზა პაპუაშვილმა გენდერულ კვოტირებაზე საუბრისას სტერეოტიპული განცხადება გააკეთა. მისი თქმით, თუ ქალები საჯარო სამსახურში არიან მათ სამუშაო დრო უნდა შეუმცირონ, რათა ოჯახისთვის და თავის მოვლისთვის მეტი დრო ჰქონდეთ.

"იმას ნუ გვამტკიცებინებთ ქალები როგორ გვიყვარს. ქალს სჭირდება მოვლა, ქალს სჭირდება გაფრთხილება".

დღეს, 23 მარტს, საქართველოს პარლამენტმა, პირველი მოსმენით, გენდერული კვოტების შესახებ კანონპროექტს მხარი არ დაუჭირა. კანონპროექტს 150 დეპუტატიდან მხოლოდ 66-მა დაუჭირა მხარი. ზაზა პაპუაშვილი ერთ-ერთია, ვინც კანონპროექტს მხარი არ დაუჭირა.

ცვლილებების პროექტი საპარლამენტო არჩევნებში სავალდებულო გენდერული კვოტების შემოღებას გულისხმობს. კანონპროექტი პროპორციული სიით წარდგენილ კანდიდატთა სიებისთვის 50 პროცენტიან კვოტას აწესებს, რაც ნიშნავს, რომ პროპორციულ სიაში ყოველი მეორე ქალი უნდა იყოს.

საკანონმდებლო ინიციატივის მიღების შემთხვევაში, 2020 წლის მოწვევის პარლამენტში პარტიული სიით არჩეული 77 დეპუტატიდან 38 იქნება ქალი, რაც პარლამენტის მთლიანი შემადგენლობის მხოლოდ 26 პროცენტია (პარლამენტის 150 წევრს შორის 38 ქალი). კანონპროექტი არ ვრცელდება მაჟორიტარულ საარჩევნო სიაზე.

გაიგეთ მეტი: