Check in Georgia 2018-ის საქართველოში რეკლამირებისთვის 500 000 ლარი დაიხარჯება. სარეკლამო მომსახურების შეძენას საქართველოს ტურიზმის ადმინისტრაცია შპს ალმასგან პირდაპირი შესყიდვის წესით, ტენდერის გარეშე გეგმავს. უწყება თანხმობას შესყიდვების სააგენტოსგან ელოდება.

სარეკლამო (საიმიჯო ვიზუალის) განთავსება სარეკლამო ბანერებზე, ბილბორდებსა და მონიტორებზე თბილისში, ბათუმში, ქუთაისსა და ზუგდიდში იგეგმება. გარდა ამისა, რეკლამა განთავსდება თბილისის, ბათუმისა და ქუთაისის საერთაშორისო აეროპორტებში. ჯამში რეკლამა 36 ადგილზე განთავსდება.

"აღნიშნული შესყიდვის მიზანია, ინფორმაციის ხელმისაწვდომობის გაზრდის უზრუნველყოფა პროექტ ჩექინ ჯორჯია 2018-ის ფარგლებში განსახორციელებელი ღონისძიებების თაობაზე როგორც ქვეყნის შიდა ტურისტული პოტენციალის, ასევე საერთაშორისო ტურისტული ნაკადის გაზრდის მიზნით", - აღნიშნულია ტურიზმის ეროვნული ადმინისტრაციის მიერ შესყიდვების სააგენტოსთვის მიწერილ დასაბუთებაში.

უწყება განმარტავს, რომ ის ადგილები, სადაც რეკლამა უნდა განთავსდეს ხალხმრავალია.