"არა ჰესებს", "არ დაგვინგრიოთ სოფლები", "შეინარჩუნე რაჭა", სვანეთი ჩემი სახლია არ დამიტბორო, - ეს ის მთავარი მოთხოვნებია, რომელიც ჰესების აშენების საწინააღმდეგო აქციაზე გააჟღერეს. აქცია-მსვლელობა დღეს, 14 მარტს, თბილისში გაიმართა. აქციიაზე დასასწრებად თბილისის გარდა, სვანეთიდან, რაჭა-ლეჩხუმიდან, მთიულეთიდან და ხევიდან ჩამოვიდნენ.

აქციის მონაწილეთა ნაწილის თქმით, თუკი მთავრობა არ შეწყვეტს ჰესების მშენებლობას ისინი პრობლემის მოგვარებას თავად შეეცდებიან და მშენებლებს სვანეთის ტერიორიაზე შესვლის უფლებას არ მისცემენ.

ფოტო: თამუნა გეგიძე / On.ge

ფოტო: თამუნა გეგიძე / On.ge

აქცია თავისუფლების მოედანზე დაიწყო და მსვლელობით მთავრობის კანცელარიასთან მივიდნენ. მათ პრემიერ-მინისტრთან, გიორგი კვირიკაშვილთან მოითხოვეს შეხვედრა. მათი განცხადებით, მთავრობამ უნდა შეასრულოს დაპირება და შეწყვიტოს დიდი ჰესების მშენებლობა.

ფოტო: თამუნა გეგიძე / On.ge

მოგვიანებით, მსვლელობამ თბილისის პარლამენტის შენობისკენ გადაინაცვლა, სადაც აქციის მონაწილეებმა მოუწოდეს პარლამენტის წევრებს სოლიდარობა გამოეხატათ აქციის მიმართ. მათი თქმით, ეს არის ბრძოლა არამხოლოდ ჰესების წინააღმდეგ, არამედ ქვეყნის გადასარჩენად, რადგან ჰესების მშენებლობა ბიომრავალფეროვნების, სოფლების ისტორიის და კულტურის განადგურებას ემუქრება.

საბოლოოდ, აქცია ევროპის რეკონსტრუქცისა და განვითარებისა ბანკის (EBRD) ოფისთან დასრულდა. აქციის მონაწილეების თქმით, ეს ადგილი იმიტომ აარჩიეს, რომ მოუწოდონ ბანკის თანამშრომლებს და პასუხისმგებელ პირებს არ დააფინანსონ ჰესების მშენებლობა და გაითვალისწინონ ზარალი, რომელსაც ეს პროექტები საქართველოს მიაყენებს.