14 მარტს რუსეთის პრეზიდენტი ვლადიმერ პუტინი უკრაინისგან ანექსირებულ ყირიმში გაემგზავრება და წინასაარჩევნო კამპანიის ფარგლებში მრავალათასიან მიტინგს ჩაატარებს. როგორც რუსული ტელეკომპანია დოჟდი წყაროზე დაყრდნობით იუწყება, პუტინი რეგიონალურ ტურნეს სწორედ ყირიმში დაასრულებს.

დოჟდის ცნობით, აღნიშნული ინფორმაცია პუტინის პრეს-მდივანმა დიმიტრი პესკოვმაც დაადასტურა:

"ეს რეფერენდუმის წლისთავია. სევასტოპოლსა და ყირიმში ეს დღე განსაკუთრებით მნიშვნელოვანია და აღინიშნება."

პუტინი რუსეთში ყირიმის სატრანსპორტო ინტეგრაციაზე ისაუბრებს და სავარაუდოდ, ყირიმის ხიდის მშენებლობის საკითხს გააჟღერებს. რუსეთის პრეზიდენტი ასევე დაათვარიელებს ქალაქ სიმფეროპოლის აეროპორტის ახალ ტერმინალს.

მანამდე, კომერსანტის ინფორმაციით, პუტინი არჩევნების დღეს, 18 მარტს, ხმის მიცემას ყირიმში გეგმავდა, თუმცა როგორც წყარო დოჟდთან ამბობს, ეს ვარიანტი გამოირიცხა. წყაროს თქმით, ხმას პუტინი, სავარაუდოდ, მოსკოვში მისცემს.