ყველაფერი სხვანაირადაა, როცა ქალებს ფული აქვთ - მელინდა გეიტსმა ამ შინაარსის ოპ-ედი ჟურნალ Quartz-ში გამოაქვეყნა. თავის ბლოგში, მან განაცხადა, რომ ის და მისი მეუღლე, ბილ გეიტსი, 170$ მილიონის დახარჯვას აპირებენ, რათა დაეხმარონ ქალებს მთელი მსოფლიოდან ეკონომიკურად გაძლიერებაში.

აღნიშნული თანხა ბილ და მელინდა გეიტსის ფონდიდან "ქალთა ეკონომიკური გაძლიერების ხელშესაწყობად" ოთხი წლის განმავლობაში დაიხარჯება. კვლევებზე დაყრდნობით, მან აღნიშნა, რომ ქალთა ჩაგვრის აღმოსაფხვრელად და გენდერული თანასწორობის მისაღწევად, ყველაზე სწორი გზა მათი [ქალების] ეკონომიკური გაძლიერებაა.

"მაშინ, როცა ქალს აქვს ფული, რომელსაც თავად განკარგავს, ყველაფერი უკეთესობისკენ იცვლება", - წერს მელინდა გეიტსი.

გეიტსმა, იმის დასადასტურებლად, რომ ქალთა ეკონომიკური გაძლიერება გენდერული თანასწორობის მიღწევის საუკეთესო გზაა, ოჯახის მაგალითი მოიყვანა. მისი თქმით, ოჯახი გაცილებით მეტს სარგებლობს, როცა საოჯახო ფინანსებს ქალები განაგებენ.

"კვლევები აჩვენებს, რომ ქალებს უკეთ გამოსდით ფულის ხარჯვა ისე, რომ ოჯახს გაჭირვება და სიღარიბე ააცილონ თავიდან, ვიდრე კაცებს. მაგ: ჯანსაღი საკვების შეძენა, ჯანმრთელობაზე ზრუნვა და განათლების უზრუნველყოფა", - წერს გეიტსი.

ამასთან, მელინდა გეიტსი აღნიშნავს, რომ როდესაც ქალები ეკონომიკურად ძლიერები არიან, ხალხი მათ როლს საზოგადოებაში განსხვავებულად აფასებს.

"ქალებს, რომლებიც საკუთარი ნებით იღებენ გადაწყვეტილებებს, შეუძლიათ გააკეთონ ის, რასაც ვერცერთი საქველმოქმედო ორგანიზაცია ვერ გააკეთებს: მათ შეუძლიათ შეცვალონ დაუწერელი კანონები გენდერული უთანასწორობის შესახებ", - წერს გეიტსი.

"ჩვენი მიზანია, რომ სწორი, მიზნობრივი ინვესტიციით დავეხმაროთ ქალებს, შეცვალონ არსებული წესები", - დაამატა მან.

ოპ-ედის თანახმად, დონაცია სამ ნაწილად განხორციელდება. პირველ რიგში, მელინდა და ბილ გეიტსების ფონდი დაეხმარება ქალ ფერმერებს, რათა მათ შეძლონ საკუთარი პროდუქტის კონკურენტუნარიან ფასებში გაყიდვა. მეორე მხრივ, ფონდის ინვესტიცია განაწილდება რვა ქვეყანაში, მათ შორის ინდოეთში, პაკისტანსა და ტანზანიაში, რათა ხელი შეუწყონ ქალთა შორის ციფრული საბანკო სერვისების გამოყენებას... და ბოლოს, ფონდი ხელს შეუწყობს ისეთი Self-help ჯგუფების შექმნასა და განვითარებას, რომლებიც ქალებს შორის ყველანაირ ინფორმაციას გაავრცელებს, მათ შორის "მცირე ბიზნესის დაწყებისა და ჯანმრთელი შვილის აღზრდის" შესახებ.