ქართულმა მხარემ ერგნეთის მოლაპარაკებების დღევანდელი შეხვედრა პროტესტის ნიშნად დატოვა.

როგორც სუს-ის საინფორმაციო ანალიტიკური დეპარტამენტის უფროსის მოადგილემ, კახაბერ ქემოკლიძემ ჟურნალისტებს განუცხადა, რომ ტატუნაშვილის საქმეზე მათ მკაფიო პასუხები ვერ მიიღეს და ამის გამო ქართულმა შეხვედრის შეჩერება გადაწყვიტა.

მისი თქმით, შეხვედრაზე დაისვა ორი საკითხი: ტატუნაშვილის ცხედრის გადმოსვენება და ლევან ქუტაშვილისა და იოსებ პავლიაშვილის ახალგორის ციხიდან ცენტრალური ხელისუფლების მიერ კონტროლირებად ტერიტორიაზე გადმოყვანა. როგორც ქემოკლიძემ აღნიშნა, ოსური მხარე იმავე პოზიციაზე დგას.

ქემოკლიძის თქმით, დე ფაქტო სამხრეთ ოსეთის მხარე ამბობს, რომ მათ რუსეთის ექსპერტიზის ბიუროში გადაგზავნილი აქვთ მასალები და პასუხის მიღების შემდეგ გადაასვენებენ ცხედარს ოჯახში. თუმცა მათ არ დაუზუსტებიათ როდის მოხდება ეს.

მისივე განმარტებით, მოლაპარაკებები მას შემდეგ აღდგება, რაც ტატუნაშვილისა და ახალგორის ციხეში დაკავებულების საკითხზე კონკრეტული პასუხები გაიცემა.

ტატუნაშვილის საქმე:

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე ცხინვალისი ციხიდან ახალგორის ციხეში გადაიყვანეს. ოსური მხარე მათ გათავისუფლებაზე უარს ამბობს.

გაიგეთ მეტი: