დე ფაქტო სამხრეთ ოსეთის საგარეო უწყება ცხინვალის გარდაცვლილი არჩილ ტატუნაშვილის საქმეზე აცხადებს, რომ მოვლენების მსგავსი განვითარება მათ ინტერესებში არ შედიოდა.

ოკუპირებული ცხინვალის უწყების თქმით, იზოლატორში დაკავებული ტატუნაშვილი თავს დაესხა ციხის თანამშრომელს და წართმეული იარაღით სროლას ცდილობდა. მათივე თქმით, მათ ეს ქმედება ძალის გამოყენებით აღკვეთეს.

დე ფაქტო უწყების განმარტებით, ისინი ატარებენ დეტალურ ექსპერტიზას, რათა არჩილ ტატუნაშვილის გარდაცვალების მიზეზი დადგინდეს და ოჯახს ცხედარი ამის შემდეგ გადაეცეს.

ოსური მხარე, საქართველოს რეაქციას გადამეტებულ უწოდებს და მათი აზრით, ზოგიერთი ამ საკითხს შიდა პოლიტიკური ბრძოლებისთვის იყენებს.

"მომხდარს განვიხილავთ, როგორც ქართული საზოგადოების რეალურ დამოკიდბეულებას სამხრეთ ოსეთისა და მისი მაცხოვრებლების მიმართ. ანტიოსური ვაკხანალია რეკორდულ მაჩვენებელს მიაღწია", - ნათქვამია განცხადებაში.

მათი თქმით, რიგი სახელმწიფოებისა და საერთაშორისო ორგანიზაციების ხელმძღვანელები, მათ შორის ჟენევის დისკუსიების მონაწილეები, აგრძელებენ საკუთარი შეშფოთების გამოხატვას და სიტუაციის დასაძაბად პროვოცირებენ:

"მათი პოზიციების გასაგებია – ფულადმა სახსრებმა, რომლებიც დონორების მიერ საქართველოში იხარჯებოდა "შერიგების" სხვადასხვა პროექტზე, შედეგები არ მოიტანა".

ტატუნაშვილის საქმე:

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე ცხინვალისი ციხიდან ახალგორის ციხეში გადაიყვანეს. ოსური მხარე მათ გათავისუფლებაზე უარს ამბობს.