თბილისის მერის, კახა კალაძის თქმით, სავაჭრო ცენტრ თერგში ელექტრო გაყვანილობა რამდენიმე თვის წინ შეცვალეს და სახანძრო უსაფრთხოებით თვალსაზრისით ერთ-ერთი დაცული ობიექტი იყო.

მისი განმარტებით, ექსპერტ-კრიმინალისტების მუშაობის დასრულებისთანავე, აღდგენითი სამუშაოები დაიწყება.

"იქამდე კი, იმ ადამიანებს, რომელთა საქონელიც გადარჩა, მიეცემათ შესაძლებლობა, გვერდით ფართებში განთავსდნენ და თავიანთი საქმიანობა განაგრძონ", - განაცხადა მერმა.

თბილისის მერის განცხადებით, ბაზრობის ადმინისტრაცია მზადაა, მოიჯარეებს ინდივიდუალურად შეხვდეს და ზარალთან დაკავშირებული საკითხები განიხილონ.

თბილისში, ბაზრობა თერგში ხანძარი გვიან ღამით გაჩნდა. ცეცხლს 30-ზე მეტი სახანძრო მანქანაა აქრობდა. საგანგებო სიტუაციების მართვის სამსახურის ინფორმაციით, დამწვარია 3 000 მ2-მდე ტერიტორია. შსს-მ აღნიშნულ ფაქტზე გამოძიება უკვე დაიწყო.