თბილისის მუნიციპალიტეტის ტერიტორიაზე მშენებლობასთან დაკავშირებული რეგულაციების დარღვევისთვის დადგენილი სანქციები მკაცრდება. შესაბამის ცვლილებებს "პროდუქტის უსაფრთხოებისა და თავისუფალი მიმოქცევის კოდექსში ცვლილების შეტანის შესახებ" კანონპროექტი ითვალისწინებს. ცვლილებებთან დაკავშირებით თბილისის მერი პარლამენტის თავმჯდომარეს შეხვდა.

კალაძის ინიციატივით:

  • მშენებელი პირველივე დარღვევაზე გაფრთხილების ნაცვლად 30 ათასი ლარით დაჯარიმდება;
  • თუ მშენებელი მუშაობას განაგრძობს დამატებით 50 ათასი ლარით დაჯარიმდება;
  • თუ სახელმწიფოს ტერიტორიაზე უკანონოდ მიმდინარეობს მშენებლობა ჯარიმა 25 ათასი ლარი იქნება;
  • თუ კერძო ტერიტორიაზე უკანონოდ მიმდინარეობს მშენებლობა ჯარიმა 20 ათასი ლარი იქნება;
  • მესამე და მეოთხე კლასის ობიექტებზე ჯარიმა 15 და 20 ათას ლარამდე იზრდება.

"ნებისმიერ დარღვევაზე, დამრღვევს ჯარიმა 30 000 ლარი გამოეწერება. მშენებლებსაც ვუთხარით, რომ თვითონ უნდა იყვნენ დაინტერესებული, როდესაც ისინი მუშებს ხელშეკრულებას უფორმებენ და თვითონ მუშებმაც უნდა იცოდნენ, თუ რა სანქციები მოჰყვება უსაფრთხოების წესების დარღვევას", - განაცხადა კახა კალაძემ.

პარლამენტის თავმჯდომარის, ირაკლი კობახიძის განცხადებით, აღნიშნული ინიციატივის განხილვა პარლამენტში უახლოეს პერიოდში დაიწყება.

გაიგეთ მეტი: