სახელმწიფო აუდიტის სამსახურის დასკვნის მიხედვით, თბილისის მერიამ 2015 წელს იმაზე მეტი ორმო ამოიღო, ვიდრე ხე დარგო. დასკვნის მიხედვით, ამით მერიამ არაეფექტიანად დახარჯა ფული. აუდიტის დასკვნა 15 თებერვალს გამოქვეყნდა.

აუდიტის სამსახური განმარტავს, რომ თბილისის მერიამ მთავრობისგან ტენდერის გარეშე ხეების დასარგავად მომსახურების შეძენაზე ნებართვა მიიღო, მაინც არ დარგო. მერიამ 2015 წელს მთავრობისგან 400 ათასი მცენარის შეზღუდულ ვადაში დასარგავად ტენდერის გარეშე შესყიდვის უფლება მოითხოვა და მიიღო. პროექტით, გაზაფხულსა და შემოდგომაზე 200-200 ათასი ხე უნდა დარგულიყო. ამავე მომსახურებით იყო გათვალისწინებული ნერგებისთვის მიწის ამოღება და მოვლა.

საგაზაფხულო რგვების პერიოდში, თებერვლიდან მაისის ჩათვლით, მუნიციპალიტეტმა შეისყიდა 72 043 სხვადასხვა დასახელების ნერგის დარგვა და შემდგომი მოვლა-პატრონობის მომსახურება. იმავე მომსახურების შემოდგომით შესაძენად მერიამ პროცედურები 2015 წლის სექტემბერში დაიწყო.

"თებერვლიდან სექტემბრამდე პერიოდისათვის არსებობდა საზოგადოებრივი მნიშვნელობის ღონისძიების დროში შეუზღუდავად და შეუფერხებლად ჩატარების შესაძლებლობა. შესაბამისად, მუნიციპალიტეტის მერიის მიერ საქართველოს მთავრობის სამართლებრივი აქტის განმარტებით ბარათში მოყვანილი არგუმენტი, საშემოდგომო რგვებისათვის გამარტივებული შესყიდვის გამოყენების შესახებ, არ იყო სათანადოდ დასაბუთებული", - აღნიშნულია აუდიტის დასკვნაში.

ამ გარემოებებიდან გამომდინარე, აუდიტის სამსახური მიიჩნევს, რომ თბილისის მერიამ ელექტრონული ტენდერებით თანხების დაზოგვის შესაძლებლობა არ გამოიყენა.

"მით უმეტეს, რომ ამ პერიოდში ათვისებულია საერთო თანხის 74 პროცენტი", - განმარტებულია დასკვნაში.