და აი, ვალენტინობის დღეც მოვიდა - დღე, რომელსაც ჯერ კიდევ მეხუთე საუკუნეში რომში აღნიშნავდნენ. თუმცა ახლა 2018 წლის 14 თებერვალია და როგორც ყოველთვის, ბევრმა ჩვენგანმა ამ წელსაც ვერ მოასწრო ვალენტინობამდე "იმ ერთადერთის" პოვნა.

"რა საჭიროა სიყვარულის დღე"; "ყველა დღე ისედაც სიყვარულისთვის არის განკუთვნილი"; "არ მიყვარს ბანალური დღესასწაულები" - ამ და სხვა მსგავსი ფრაზებით თავს ვეღარ იმშვიდებთ? ეგ არაფერი. მოიმარჯვეთ თქვენი ერთგული სმარტფონები და ნახეთ 10 აპლიკაცია, რომელიც თავს უკეთ გაგრძნობინებთ.

1. Kissing Test

გაინტერესებთ როგორი კოცნა იცით? ეს არის აპლიკაცია, რომელიც საკუთარი შესაძლებლობების გადამოწმების საშუალებას მოგცემთ და თვითშეფასებასაც აგიწევთ.

2. Waterminder

თუ ბედნიერი და მოსიყვარულე წყვილების ფოტოები გაღიზიანებთ, აპლიკაცია Waterminder ცივი და რაც მთავარია თქვენი ორგანიზმისთვის აუცილებელი წყლის მომდევნო ულუფის დალევას შეგახსენებთ.

3. Tinder

ადამიანების გასაცნობად Tinder ერთ-ერთი ყველაზე კარგი და მარტივი გზაა, მსოფლიოში მას მილიონობით ადამიანი იყენებს. მისი მეშვეობით შეგიძლიათ ის ადამიანები იპოვოთ, რომლებსაც თქვენსავით ყელში აქვთ ამოსული ვალენტინობის დღესასწაული.

4. Grindr

ეს აპლიკაცია გეებისთვის არის შექმნილი და კიდევ უფრო სახალისო და პირდაპირია, ვიდრე ტინდერი. Grindr უცნობ ადამიანებთან მიმოწერის, გაცნობისა და შეხვედრის შესაძლებლობას მოგცემთ. აღსანიშნავია, რომ აპლიკაციის წარმატებით გამოსაყენებლად ერთი-ორი "ცხელი" სელფი გამოგადგებათ.

5. Youtube

მართალია, იუთუბის შესახებ თითქმის ყველამ იცის, მაგრამ თუ მოწყენილი და მარტოსული ხართ, მისი უფრო რაციონალურად გამოყენებაც შესაძლებელია. გვინდა გირჩიოთ ერთი არაჩვეულებრივი არხი, სადაც ქალი, რომელიც ყველანაირი ცივილიზაციისგან მოშორებით, მარტოდმარტო ცხოვრობს, ყველაფერს საკუთარი ხელით აკეთებს. მისი ყურება ნერვებზე დამამშვიდებლად მოქმედებს.

6. SimCity

Simcity არის თამაში, სადაც საკუთარი ქალაქის აშენება და ალტერნატიული რეალობის შექმნა შეგიძლიათ. ააშენეთ ქალაქი, სადაც არავინაა მარტოსული და ვალენტინობის დღეს ყველა საყვარელ ადამიანთან ერთად ატარებს.

7. DAILY YOGA

თუ არ იცით გეტყვით, რომ იოგას მთავარი დანიშნულება პიროვნებისათვის თვითრეალიზაციაში ხელშეწყობაა, ეს აპლიკაცია კი სწორედ ამაში დაგეხმარებათ და სულიერ სიმშვიდესაც მოგანიჭებთ. აპლიკაცია მხოლოდ iOS მოწყობილობებისათვისაა ხელმისაწვდომი.

8. COOKING DASH

რომანტიკული ვახშმის ნაცვლად, სამზარეულოში ტრიალი და გემრიელი კერძების კეთება მოგინდათ? მაშინ თამაში Cooking Dash სწორედ თქვენთვისა. კმაყოფილი კლიენტების ყურება და მაღალი ანაზღაურება კარგ ხასიათზე დაგაყენებთ.

9. Find My Family, Friends, Phone

თუ სიყვარულში არ გიმართლებთ, ეს აპლიკაცია თქვენი ოჯახის წევრებისა და მეგობრების ადგილსამყოფელის შესახებ მოგაწვდით ინფორმაციას. ოჯახის მხარდაჭერა მნიშვნელოვანია. აპლიკაცია iOS-ზეა ხელმისაწვდომი.

10. SkyView

ბევრს სჯერა, რომ ჩვენი ბედი კოსმოსში წყდება, თუ თქვენც მათ შორის ხართ და თქვენს მარტოობას იუპიტერის მთვარის სახლში სტუმრობას უკავშირებთ, გადმოწერეთ აპლიკაცია Skyview,რომელიც ასევე მხოლოდ აიოსის დევაისზეა ხელმისაწვდომი და მომდევნო 14 თებერვლის სასიყვარულო ამბები ერთი წლით ადრე განჭვრიტეთ.