იუსტიციის მინისტრი თეა წულუკიანი აცხადებს, რომ პირადი ცხოვრების ამსახველი კადრების შესახებ ინფორმაციის გავრცელების გამო სამინისტრო საინფორმაციო სააგენტო ინეტრპრესნიუსთან და რადიო ფორტუნასთან თანამშრომლობას წყვეტს. თეა წულუკიანმა ეს განცხადება ფეისბუქის პირად გვერდზე დღეს, 11 მარტს გამოაქვეყნა:

"როგორც ყოფილი ოპოზიციონერი, როგორც ქალი და შესაბამისად ადამიანი (მეტი სხვა სტატუსი არც მინდა ამის წერისას რომ მქონდეს და მძულს ისიც კი, რომ ამის წერა მიწევს), საჯაროდ ვაცხადებ, რომ სამინისტროს სისტემა ipn.ge-თან და ასევე რადიო ფორტუნასთან, მომხდარის გამო, აღარ ითანამშრომლებს. ეს ნიშნავს იმას, რომ ნიუსებს ჩვენგან ოფიციალური რელიზების თუ ინფორმაციების სახით, აღარ მიიღებთ. ინსტრუქცია უკვე ჩაშვებულია აპარატში და სამინისტროს 11-ვე სსიპ-ში და პირადად გავაკონტროლებ ყველა ჩემი სტრუქტურის ყველა პიართანამშრომელს, რომელიც ამ ინსტრუქციის დარღვევისათვის მკაცრად დაისჯება.

მედიამ, მათ შორის პოპულარულმა, მაუწყებლობის ელემენტარული წესები უნდა იცოდეს.

45-50 წუთი დასჭირდათ სპეცსამსახურებსა და აიტისპეციალისტებს, პარტნიორებს, რეაგირებისა და დაბლოკვისათვის, ტირაჟირება კი ზოგიერთს ამ პერიოდში ვერავინ დაასწრო. გულისრევის სმაილი".

მთავარმა პროკურატურამ აღნიშნულ ფაქტზე სისხლის სამართლის საქმის გამოძიება დაიწყო სისხლის სამართლის კოდექსის 157-ე მუხლის მეორე ნაწილით. აღნიშნული მუხლი გულისხმობს პირადი ან ოჯახური საიდუმლოს უკანონოდ გამოყენებას, ანდა გავრცელებას ამა თუ იმ ხერხით გავრცელებულ ნაწარმოებში, მასობრივი მაუწყებლობით. ან სხვა საჯარო გამოსვლისას. დამტკიცების შემთხვევაში, დანაშაული ისჯება ჯარიმით ან გამასწორებელი სამუშაოთი ვადით ორ წლამდე, ანდა თავისუფლების აღკვეთით იმავე ვადით.