"თითოეული თქვენგანი დღეს აქ განსაკუთრებული მიზეზით იმყოფება. მთელი სეზონის განმავლობაში ჩვენ ერთად ვეხმარებოდით One Million Acts of Good-ს ძალიან კარგ საქმეში. სწორედ ამიტომ, დამიჯერეთ, არ არსებობს დაბადების დღის აღნიშვნის იმაზე უკეთსი საშუალება, ვიდრე თქვენთან ერთად ყოფნაა", - ასე დაიწყო ელენ დეჯენერესმა თავისი 60 წლის იუბილესთან დაკავშირებული გადაცემის აღნიშვნა.

ლეგენდარულმა ტელეწამყვანმა, ისე როგორც ამას ხშირად აკეთებს, გადაწყვიტა თავისივე დაბადების დღეზე სხვებიც გაეხარებინა და აუდიტორიაში მყოფ სტუმრებს $1 მილიონი აჩუქა.

"მე თქვენთვის ძალიან დიდი საჩუქარი მაქვს, ისეთი, როგორიც არასდროს არავისთვის მიჩუქებია. გაინტერესებთ რა არის ეს? თქვენ ჩემგან მიიღებთ ერთ მილიონ დოლარს, რომელიც თანაბრად განაწილდება თითოეულ თქვენგანზე და იმედი მაქვს ისევ გააგრძელებთ სხვების დახმარებას", - თქვა ელენმა.

ლეგენდარული ტელეწამყვანი, ყველაზე მხიარული, სასაცილო, ძალიან ჭკვიანი და შეუდარებელი ელენ დეჯენერესი უკვე 60 წლის არის.

საკუთარი კარიერის განმავლობაში, რომელიც 40 წელზე მეტს ითვლის, ელენმა ძალიან ბევრი რამ გააკეთა, არამხოლოდ თავის საქმიანობაში, არამედ, სამყაროს უკეთესობისკენ შეცვლაშიც.

ელენი იყო პირველი ღიად ლესბოსელი ქალი, რომელიც თოქ-შოუს წამყვანი გახდა, ამავდროულად ის ყოველ წელს ხვდება Forbes-ის ყველაზე მაღალანაზღაურებადი სატელევიზიო ვარსკვლავების სიაში და Hollywood Reporter-ის სიაში, როგორც შოუბიზნესის ყველაზე გავლენიანი ადამიანი.

2016 წელს, აშშ-ის ყოფილმა პრეზიდენტმა, ბარაკ ობამამ მას თავისუფლების საპრეზიდენტო მედaლი გადასცა. ესაა ყველაზე მაღალი ჯილდო, რომელიც ამერიკის მოქალაქემ შეიძლება მიიღოს.

"მარტივი დასავიწყებელია რა გამოიარე, როცა ძალიან შორს წახვალ, მითუმეტეს ახლა, როდესაც ქორწინების უფლება კანონით ყველას თანასწორად ეკუთვნის. უბრალოდ წარმოიდგინეთ, რამხელა სიმამაცე დასჭირდებოდა ელენს, თითქმის 20 წლის წინ, როდესაც საზოგადოების წინაშე საჯაროდ წარსდგა. როგორი მნიშვნელოვანი იყო ეს მაშინ, არა მხოლოდ ლგბტ საზოგადოებისთვის, არამედ ყველა ჩვენგანისთვის, რომ გვენახა, რომ ვიღაც, ასეთი სიკეთით სავსე და ნათელი, ვინც ასე ძალიან მოგვწონდა, ვინც შეიძლება ყოფილიყო ჩვენი მეზობელი, კოლეგა ან და, ყველა ჩვენგანის პასუხისმგებლობას იკისრებდა.

მან გარისკა თავისი კარიერა, ადამიანები ამას ხშირად არ აკეთებენ. ელენი ჩვენ გვაერთიანებს, შთაგვაგონებს, ერთი ხუმრობითა და ერთი ცეკვით ის უკეთესად გვხდის", - თქვა დაჯილდოებისას ბარაკ ობამამ.

1997 წელს, როდესაც ელენის სერიალის მეოთხე სეზონი გადიოდა, დეჯენერესმა ქამინგ აუთი (საკუთარი სექსუალური ორიენტაციის გამჟღავნება) გააკეთა. ამავე პერიოდში ის ჟურნალ Time-ის მთავარი პერსონაჟიც გახდა და ოპრა უინფრის შოუშიც ხმამაღლა ისაუბრა ამ თემაზე.