საზოგადოებრივი მაუწყებლის აჭარის ტელევიზიისა და რადიოს მენეჯმენტი რადიო თავისუფლების გარშემო განვითარებულ მოვლენებთან დაკავშირებით წერილს აქვეყნებს. მაუწყებლის განცხადებით, მათი წარმატება რადიო თავისუფლების ქართულ წარმომადგენლობასთან პარტნიორობაზე მნიშვნელოვნად იყო და არის დამოკიდებული.

"ჯერ კიდევ აჭარის ავტონომიური რესპუბლიკის მთავრობის საქვეუწყებო დეპარტამენტის სტატუსით მუშაობისას, პოლიტიკური და პარტიული წნეხის მიუხედავად, რადიო აჭარას ჰქონდა ფუფუნება ეთანამშრომლა რადიო თავისუფლებასთან. ამ თანამშრომლობის შედეგად შეძენილმა გამოცდილებამ მნიშვნელოვანი როლი ითამაშა როგორც რადიო აჭარის, ასევე აჭარის ტელევიზიის საზოგადოებრივ მაუწყებლად გარდაქმნის საკმაოდ რთულ საქმეში", - წერია წერილში.

მაუწყებლის განმარტებით, მაშინ როდესაც საზოგადოებრივი მაუწყებლების ისტორიული გამოცდილება ყოველთვის კითხვის ნიშნის ქვეშ იდგა, რადიო თავისუფლების გუნდთან ერთად შეცვალეს ეს დამოკიდებულება.

როგორც წერილშია აღნიშნული, ისეთი საიმედო მედიაპარტნიორის არსებობა, როგორიც რადიო თავისუფლების გუნდია, მნიშვნელოვან როლს შეასრულებს არა კონკრეტული ტელე და რადიო არხის, არამედ მთლიანად საზოგადოებრივი მაუწყებლის იდეის და ქვეყნის განვითარებისათვის მომდევნო ეტაპების წარმატებაში.

"რადიო თავისუფლების მიზნები საქართველოში დემოკრატიული ინსტიტუტების და ადამიანთა უფლებების განვითარების მიმართულებით უცვლელი დარჩება".

რადიო თავისუფლების ორი პროექტი, რომლებიც საზოგადოებრივი მაუწყებლის პირველ არხზე გადიოდა და დაიხურა, აჭარის ტელევიზიის ეთერში გადის. თანამშრომლობა რამდენიმე თვის წინ დაიწყო.

რადიო თავისუფლების (RFE/RL) ქართული სამსახურის დირექტორი დავით კაკაბაძე სამსახურიდან გაათავისუფლეს.

RFE/RL-ის სათაო ოფისის მენეჯმენტსა და ქართული სამსახურის ხელმძღვანელს დავით კაკაბაძეს შორის უთანხმოების შესახებ რამდენიმე დღის წინ, 23 იანვარს გახდა ცნობილი. 25 იანვარს, რადიოს ქართულმა ბიურომ განაცხადა, რომ უთანხმოების გადაჭრის გზად მენეჯმენტმა კაკაბაძის გათავისუფლება დაისახა, რასაც მოჰყვა რედაქციის სრული შემადგენლობის წერილობითი პროტესტი რთე/რთ-ის პრეზიდენტის, ტომ კენტის სახელზე.