თბილისი მოლში ჰიპერმარკეტ კარფურის სენდვიჩების ჭამის შემდეგ, ინფექციურ საავადმყოფოში კიდევ ოთხი პაციენტი მოხვდა მოწამვლის სიმპტომებით. ექიმმა თემურ ქველიძემ On.ge-ს განუცხადა, რომ 23 იანვრის შემდეგ, მათთან სულ 10 ავადმყოფი შევიდა, აქედან ორი უკვე გაეწერა, ორი კი დღეს წავიდა.

თემურ ქველიძის თქმით, პაციენტები გუშინ, 25 იანვარს დღის მეორე ნახევარში შევიდა სამკურნალოდ, იგივე სიმპტომებით, რაც სხვებს ჰქონდათ მანამდე:

"მათ განაცხადეს, რომ ერთსა იმავე ადგილზე მიირთვეს სენდვიჩი. დიაგნოზი არის სალმონელოზი, რაც ბაქტერიოლოგიურადაც დადასტურებულია".

პაციენტების მდგომარეობა ამჟამად სტაბილურია, ვინაიდან როგორც ექიმი ამბობს, დროულად მიმართეს სამედიცინო დაწესებულებას.

სურსათის ეროვნულმა სააგენტომ თბილისი მოლში, ჰიპერმარკეტ კარფურში არსებულ სენდვიჩების განყოფილებას, საწარმოო პროცესი 24 იანვარს შეუჩერა.

სურსათის უვნებლობის სააგენტოს განცხადებით, ინსპექტორებმა დაავადებათა კონტროლის ეროვნული ცენტრიდან მიღებული შეტყობინების საფუძველზე ჩაატარეს არაგეგმური ინსპექტირება. უწყების განცხადებით, შემოწმებისას გამოვლინდა კრიტიკული შეუსაბამობა.