მას შემდეგ, რაც საქართველო რუსეთის დამაკავშირებელ გზაზე, დევდორაკის ხეობაში მეწყერმა საავტომობილო გზა წაიღო, არსებობდა შესაძლებლობა, რომ სომხურ სატვირთო ავტომობილებს ტვირთი რუსეთის მიმართულებით ნეიტრალური სტატუსით გაეტარებინათ ცხინვალისა და როკის გვირაბის გავლით.

საქართველოს პრემიერ მინისტრის განმარტებით, დე-ფაქტო სამხრეთ ოსეთის ტერიტორიაზე ნეიტრალური სტატუსით ტვირთის გატარების შესახებ მოლაპარაკებები სომხურ მხარესთან არ შედგა.

გიორგი კვირიკაშვილის განცხადებით, რუსეთის ფედერაციის მხრიდან იყო არაადეკვატური პასუხი, რაც არაღიარებული ტერიტორიის სტატუსს უკავშირდებოდა. ქართულმა მხარემ ამ გზის გამოყენებაზე უარი განაცხადა:

"ჩვენ უარი ვთქვით ამ გზის გამოყენებაზე, ვინაიდან, ჩვენი წინადადება იყო, რომ მხოლოდ და მხოლოდ ჩვენი არსებული კანონმდებლობის ფარგლებში მომხდარიყო ფორსმაჟორული გახსნა ამ არხის. ჩვენ ავირჩიეთ ბორანის გზა. შავი ზღვის მეშვეობით გადის დღესდღეობით ეს ტვირთი რუსეთის მიმართულებით".

პრემიერის თქმით, საქართველოს ხელისუფლების წინადადება იყო, რომ მხოლოდ და მხოლოდ საქართველოს კანონმდებლობის ფარგლებში მომხდარიყო ამ არხის ფორსმაჟორული გახსნა.

კვირიკაშვილის განმარტებით, დევდორაკის მეწყერის ჩამოწოლის შედეგად გზა არის განადგურებული, რის შეკეთებას დასჭირდება სავარაუდოდ 2 კვირა მაინც. ამ პერიოდში დიდი პრობლემა ექმნებათ საქართველოს ექსპორტიორებს რუსეთის ბაზარზე ხილის გატანის კუთხით და ასევე პრობლემა შეექმნათ სომხეთის წარმომადგენლებს, ბიზნესმენებს:

"კანონი ოკუპირებული ტერიტორიების შესახებ ფორსმაჟორულ სიტუაციებში ითვალისწინებს ნეიტრალური სტატუსით ტვირთის გატარებას ე.წ. სამხრეთ ოსეთის ტერიტორიაზე, ამიტომ ამ რეჟიმში გვინდოდა, რომ ჩვენ გაგვეტარებინა ეს ტვირთები, რათა არ მიგვეყენებინა ძალიან დიდი ზარალი ჩვენი ბიზნესმენებისთვის და ასევე სხვებისთვის, ვისაც სურდათ საქართველოს ტერიტორიაზე ტვირთის გატარება. სამწუხაროდ, ჩვენმა სომეხმა კოლეგებმა გვაცნობეს, რომ რუსეთის ფედერაციიდან იყო ცოტა არ იყოს არაადეკვატური პასუხი, რაც უკვე პირდაპირ იყო დაკავშირებული მათ მიერ აღიარებული ტერიტორიის სტატუსთან".

პრემიერი SGS-ის ხელშეკრულების საკითხსაც შეეხო. მისი თქმით, იგი გადააგზავნეს რუსულ მხარესთან და ჯერჯერობით პასუხი არ მიუღიათ.