ბახალას მომხრეები, პრეზიდენტს და საქართველოს პარლამენტს მისი გათავისუფლების მოთხოვნით მიმართავენ. ხელმოწერების შესაგროვებლად მანიფესტი შეიქმნა.

მანიფესტში აღნიშნულია, რომ გიორგი გიორგანაშვილი უსამართლო სისტემის მორიგი მსხვერპლია და სამართალდამცავებმა დაკავებისას ნარკოტიკი ჩაუდეს:

"ბოლო დროის მსგავსი გახმაურებული საქმეების მსგავსად, მის საქმეშიც მოწმეები მხოლოდ პოლიციელები არიან. ისიც გაჩხრიკეს და ამოუღეს 0,3726 გრამი ბუპრენორფინი. ჩხრეკას (ბნელ და უკამერო ადგილას) მხოლოდ პოლიციის თანამშრომლები ესწრებოდნენ. გიორგიც უშედეგოდ ითხოვდა ექსპერტიზა ჩატარებოდა, თუნდაც, მის ქურთუკს.

“რეპერების საქმემ” კიდევ ერთხელ ნათლად დაგვანახა როგორი სასტიკი და უსამართლოა არსებული სისტემა, როგორ წარმატებით აგრძელებს პოლიცია ნარკოტიკების “ჩადების” პრაქტიკას, როგორ უსპობს ახალგაზრდებს რაიმეს კეთების სურვილს და ჩვეულებრივ ჯალათად გვევლინება. განსაკუთრებით ცინიკურია სასჯელის ზომა (8-20 წელი ან უვადოდ!!!), მაშინ, როდესაც განზრახ მკვლელობისთვის სასჯელი 7დან 15 წლამდეა, რომ არაფერი ვთქვათ სხვა მძიმე დანაშაულებზე, როგორიცაა ყაჩაღობა, გაუპატიურება და სხვა."

მსახიობი გიორგი გიორგანაშვილი 25 იანვარს დააკავეს. შსს-ს ინფორმაციით, პირადი ჩხრეკისას 45 აბი და 4 აბის ნატეხი, ანუ 0,3726 გრამი სუბოტექსი აღმოუჩინეს. მსახიობის თქმით, მას ნარკოტიკული საშუალება ჩაუდეს. ის ბრალს არ აღიარებს და საპროცესო შეთანხმებასაც არ თანხმდება.

გუშინ, თბილისის საქალაქო სასამართლომ შენახვა-ფლობისათვის 8-წლიანი პატიმრობა მიუსაჯა. პროცესის შემდეგ, სასამართლოსთან ხმაურის მოძრაობის აქტივისტი ბექა წიქარიშვილი და მსახიობი თორნიკე ბზიავა დააკავეს. თორნიკე ბზიავა უკვე გაათავისუფლეს.

გიორგანაშვილის დაკავების გასაპროტესტებლად, თბილისში, კანცელარიასთან 25 იანვარს ხუთ საათზე, აქცია გაიმართება.