დე ფაქტო სამხრეთ ოსეთის პროკურატურამ მარეკ დუდაევის მკვლელობაში ბრალდებულის ვინაობა დაასახელა. ინფორმაციას Sputnik-ossetia ავრცელებს.

განცხადებაში ნათქვამია, რომ სისხლის სამართლის საქმე მკვლელობისა და ცეცხლსასროლი იარაღის უკანონო შენახვის მუხლებით სოფელ არცევის მკვიდრის, ვიაჩესლავ კაზიევის წინააღმდეგაა აღძრული.

"ამ ეტაპზე კომპლექსური სამუშაოები მიმდინარეობს, რათა მკვლელობის ყველა გარემოება და კაზიევის ადგილსამყოფელი დადგინდეს".

ოკუპირებული სამხრეთ ოსეთის შინაგან საქმეთა სამინისტრომ განაცხადა, რომ სოფელ არცევში, ერთ-ერთ შენობაში მარეკ დუდაევი გარდაცვლილი იპოვეს. მას სამი ჭრილობა ჰქონდა მიყენებული ცეცხლსასროლი იარაღით.

2004 წლის მარტში, ცხინვალში მცხოვრებ მარეკ დუდაევს საქართველოში 23-წლიანი პატიმრობა მიუსაჯეს. 2005 წლის ნოემბერში, თბილისის საოლქო სასამართლომ დამნაშავედ სცნო მკვლელობაში, ყაჩაღობასა და ფულის გამოძალვაში. ხელისუფლების შეცვლის შემდეგ, 2013 წელს ის პატიმრობიდან გაათავისუფლეს და დე ფაქტო რესპუბლიკას გადასცეს.