კარგით რა, რას ერჩით ზამთარს? - ეს ის კითხვაა, რომელსაც ალიგატორებისგან ვერასდროს გაიგონებთ. ზამთრობით მათი ჭაობიანი სახლი ყინულის სასახლედ იქცევა ხოლმე, მაგრამ ნუ იდარდებთ, ალიგატორებს სირთულეების გადალახვა არ უჭირთ.

რამდენიმე დღის წინ ჭაობების პარკი ჩრდილოეთ კაროლინაში მთლიანად გაიყინა, ალიგატორები კი ყინულოვანი ზედაპირის პატიმრები აღმოჩნდნენ.

ფოტო: Swamp Park / YouTube

წყლის თავზარდამცემმა ბინადრებმა გადარჩენა ერთ-ერთი თავდაცვითი ტექნიკის, ბრუმაციის შედეგად შეძლეს. ბრუმაცია არსით ძალიან ჰგავს ძუძუმწოვრების მიძინებას ზამთარში. რეპტილიები დაბალი ტემპერატურის საპასუხოდ ლეთარგიულები ხდებიან და მათი მეტაბოლიზმი უკიდურესად ნელდება.

როგორც წესი, ალიგატორები წყლის ფსკერზე იძინებენ ხოლმე და დღეში ერთხელ ამოდიან ჰაერისთვის ზემოთ. თუმცა ამჯერად სიტუაცია განსხვავებული აღმოჩნდა. ალიგატორები ახალ ბუნებრივ პირობებს მოერგნენ და წყლის გაყინვისას ზედაპირზე დარჩნენ, რათა თავისუფლად ესუნთქათ, სანამ მკაცრი დღეები არ დასრულდებოდა.

"ეს მოულოდნელი საქციელია. ალიგატორები საპირისპიროდ იქცევიან ხოლმე. ისინი ცდილობენ, ყინვისას ხმელეთზე დარჩნენ და მზეს მიეფიცხონ. როგორც ჩანს, ამჯერად ციკლონის მოახლოება იგრძნეს და გადაწყვიტეს, არ გაერისკათ", - აცხადებს ბიოლოგი ჯეიმს პერან როსი.

ალიგატორებს საკმაოდ ცივ წყალშიც შეუძლიათ არსებობა, თუმცა საუბარია +4 გრადუსზე ცელსიუსით, ყინულოვან წყალში კი მაქსიმუმ 1 კვირა შეუძლიათ იცოცხლონ.

ფოტო: Youtube

ფოტო: Youtube

საბედნიეროდ, ყინული რამდენიმე დღის შემდეგ გადნა და ალიგატორებიც გაცოცხლდნენ.

წარმოგედგინათ, რომ ალიგატორების ამოძრავება ოდესმე ასეთ სიხარულს მოგანიჭებდათ?