სატელეკომუნიკაციო კომპანია მაგთიკომი მიიჩნევს, რომ დღეს საქართველოში მობილურ მომსახურებაზე დაბალი ტარიფებია და ინტერნეტის მიწოდების ხარჯი და შემოსავალი ვერ აბალანსებს ერთმანეთს. ასე ეხმაურება კომპანია აბონენტებისთვის მობილური ინტერნეტის პაკეტების გაძვირებას.

"[დაბალი ტარიფების გამო] სერიოზული საფრთხის წინაშე დგება ქვეყანაში მობილურ ინტერნეტზე დაფუძნებული ტექნოლოგიების დანერგვა და განვითარება, იზღუდება როგორც კომპანიის, ისე ქვეყნის ტექნოლოგიური წინსვლა. ყოველივე ამის გათვალისწინებით, საჭიროა ტარიფები იყოს ადეკვატური, როგორც ყველა განვითარებულ ქვეყანაში და სრულ შესაბამისობაში მოდიოდეს მოქმედ კანონმდებლობასთან", - აღნიშნულია მაგთიკომის განცხადებაში.

კომპანიას მიაჩნია, რომ საქართველოში ოპერატორებს რთულ პირობებში უწევთ ოპერირება:

"სახელმწიფო საკუთრებაში არსებულ ტერიტორიებზე იჯარის საფასური ოპერატორებისთვის ბევრად მაღალია, ვიდრე იჯარის საბაზრო ფასი. 2017 წელს გაიზარდა მეტროსადგურების გვირაბებში კაბელის გატარების საფასური. ვალუტის კურსის ცვლილება, ინფლაცია და დენის ტარიფის ცვლილება პირდაპირპროპორციულად აისახება კომპანიების დანახარჯებზე".

კომპანიამ აბონენტებს ინტერნეტპაკეტების გაძვირების შესახებ რამდენიმე დღის წინ აცნობა, თუმცა მიზეზებზე On.ge-ს გუშინ, 4 იანვარს, არ ესაუბრა.

კომპანიის გადაწყვეტილებით, 18 იანვრიდან მაგთის მობილური ინტენრნეტის გამოყენება სხვადასხვა პაკეტების მომხმარებლებისთვის 2-5 ლარით იზრდება.

თითოეული პაკეტზე ფასი შემდეგნაირად იმატებს:

  • 500 მბ - 5₾ (ძველი ფასი 3₾);
  • 1000 მბ - 7₾ (ძველი ფასი 5₾);
  • 2 000 მბ - 12₾ (ძველი ფასი 7₾);
  • 4 000 მბ - 14₾ (ძველი ფასი 10₾);
  • 6 000 მბ - 18₾ (ძველი ფასი 15₾);
  • 15 000 მბ - 35₾ (ძველი ფასი 30₾).

მაგთის კონკურენტებს ჯეოსელსა და ბილაინს ტარიფების გაზრდის შესახებ ინფორმაცია ჯერ არ გაუვრცელებიათ.

18 იანვირდან მოქმედი ინტერნეტპაკეტების ფასები კომპანიების მიხედვით

ფოტო: On.ge