რუსთავი 2-თან საუბარში, თურქეთის ელჩმა საქართველოში, ზექი ლევენთ გუმრუქჩუმ საქართველოს პრეზიდენტს, პრემიერმინისტრსა და ქართველ ხალხს სოლიდარობისათვის მადლობა გადაუხადა და აღნიშნა, რომ სტამბოლში მომხდარი არ იყო დარტყმა მხოლოდ თურქეთზე, არამედ ეს იყო დარტყმა მთელ ცივილიზებულ სამყაროზე.

გუმრუქჩუმ განაცხადა, რომ კიდევ ერთხელ დარწმუნდა იმაში, რომ ტერორიზმს საზღვრები არ აქვს და აუცილებელია მსოფლიო ტერორიზმთან საბრძოლველად გაერთიანდეს, გადაიხედოს უსაფრთხოების საკითხები და გამკაცრდეს ზომებიც:

"შემზარავი თავდასხმაა, სიტყვები არ მყოფნის მომხდარის აღსაწერად. სამწუხაროდ, ეს მსოფლიოში ყველა კუთხეში ხდება. 3 თვის წინ მსგავსი რამე ბრიუსელში მოხდა. ახლა ეს სტამბოლში განმეორდა. ვიცი რამდენად მძიმეა საქართველოსთვის, რადგან ეს არის აეროპორტი, რომელსაც თქვენც ხშირად იყენებთ".

28 ივნისს, ღამით, სტამბოლის ათათურქის სახელობის აეროპორტში, 2 აფეთქებას სულ მცირე 36 ადამიანი ემსხვერპლა 147 კი დაშავებულია. მომხდარზე ჯერჯერობით არცერთ ტერორისტულ დაჯგუფებას არ აუღია პასუხისმგებლობა.