რუსთავში ხუთსართულიანი კორპუსის პირველ სართულზე გაჩენილი ხანძრის გამო სამი ადამიანი გარდაიცვალა. გარდაცვლილები კორპუსის სხვადასხვა სართულზე ცხოვრობდნენ. შემთხვევა წუხელ, დაახლოებით ღამის ორ საათზე, მოხდა.

"ძლიერი დაკვამლიანებისა და ცუდი ხილვადობის მიუხედავად, შინაგან საქმეთა სამინისტროს საგანგებო სიტუაციების მართვის სააგენტოს 20-მდე მეხანძრე-მაშველმა ხანძრის ლოკალიზება და ლიკვიდირება უმოკლეს დროში შეძლო", - აცხადებენ შსს-ში და დასძენენ, რომ შემთხვევის გამო 25-მდე ადამიანის ევაკუაცია გახდა საჭირო.

როგორც ტელეკომპანია იმედს ადგილობრივები უყვებიან, ერთ-ერთი მეზობელი თავის გადარჩენის მიზნით სახლიდან გადმოხტა.

საქმეზე გამოძიება სისხლის სამართლის კოდექსის 187-ე მუხლის მეოთხე ნაწილით დაიწყო. ამ მუხლით, ცეცხლის წაკიდებით სხვისი ნივთის დაზიანება ან განადგურება, რამაც გამოიწვია ორი ან მეტი ადამიანის სიკვდილი ისჯება თავისუფლების აღკვეთით ვადით ცხრიდან თორმეტ წლამდე.