თურქეთის პრეზიდენტი რეჯეპ ტაიპ მსოფლიოს მოუწოდებს დაიცვას იერუსალიმი, როგორც პალესტინის დედაქალაქი. მისივე თქმით, მუსლიმური ქვეყნები პალესტინის სუვერენიტეტსა და დამოუკიდებლობას არასდროს დათმობენ.

თურქული მედიის, Daily Sabah-ის ინფორმაციით, ერდოღანმა მსოფლიოს 196 სახელმწიფოს მოუწოდა საერთო პასუხი გასცენ აშშ-ის გადაწყვეტილებას და თქვა, რომ პალესტინაში მშვიდობა მხოლოდ იმ შემთხვევაში მიიღწევა, თუ საერთაშორისო საზოგადოება "დაიცავს სიმართლეს და დაუყოვნებლივ აღიარებს პალესტინის სახელმწიფოს დამოუკიდებლობას".

BBC-ის ცნობით, ერდოღანმა, ისლამური თანამშრომლობის სამიტზე, ისრაელს "ტერორის სახელმწიფო" უწოდა.

ერდოღანმა რამდენჯერმე გაიმეორა, რომ იერუსალიმი და წმინდა მეჩეთი მუსლიმური სამყაროსთვის წითელი ხაზია.

თურქეთის პრეზიდენტმა პალესტინის საერთაშორისო შეთანხმებებსა და ორგანიზაციებში გაწევრების პროცესის დაჩქარებაზეც ისაუბრა.

აშშ-ის პრეზიდენტმა დონალდ ტრამპმა იერუსალიმის ისრაელის დედაქალაქად აღიარების გადაწყვეტილების შესახებ 6 დეკემბერს განაცხადა და აშშ-ის საელჩოს თელ-ავივიდან იერუსალიმში გადატანაც დააანონსა. ჯერჯერობით, აშშ მსოფლიოს ერთადერთი ქვეყანაა, რომელიც იერუსალიმის ისრაელის დედაქალაქად აღიარებას ემხრობა.