საქართველოს სახელმწიფო უსაფრთხოების სამსახურის თანამშრომლებმა, ქრთამის აღების ბრალდებით კრწანისის რაიონის გამგეობის სამხედრო განყოფილების წამყვანი სპეციალისტი დააკავეს.

გამოძიების ვერსიით, დაკავებულმა, 25 წლის ასაკს მიღწეულ საქართველოს მოქალაქეს, სამხედრო სავალდებულო სამსახურის გადავადებაში დახმარების სანაცვლოდ ქრთამის სახით 1000 ლარის გადახდა მოსთხოვა.

უწყების მტკიცებით, 2017 წლის 8 დეკემბერს დაკავებულმა მოთხოვნილი თანხის ნაწილი 650 ლარი გამოართვა და განუმარტა, რომ ის სამხედრო სავალდებულო სამსახურიდან გათავისუფლებული იყო.

უსაფრთხოების სამსახურის განცხადებით, 2017 წლის 11 დეკემბერს, ბრალდებულმა მოქალაქეს ქრთამის სახით მოთხოვნილი თანხის დარჩენილი ნაწილი - 350 ლარი გამოართვა.

გამოძიება ქრთამის აღების ფაქტზე მიმდინარეობს საქართველოს სსკ-ის 338-ე მუხლის პირველი ნაწილით, რაც სასჯელის სახედ ითვალისწინებს თავისუფლების აღკვეთას 6-დან 9 წლამდე ვადით.