ახალი ძალების მოძრაობის ლიდერი მიხეილ სააკაშვილი პეჩორის სასამართლოში მიიყვანეს. სხდომა კიევის დროით 11:00 საათზე დაიწყება. სააკაშვილის მომხრეები დილიდან იკრიბებიან. სასამართლოს შენობასთან გაძლიერებული დაცვა დგას.

პროკურორები ოდესის ყოფილი გუბერნატორისთვის ელექტრონული სამაჯურით შინაპატიმრობას მოითხოვენ. გენპროკურორმა, იური ლუცენკომ განაცხადა, რომ სააკშვილი საპროტესტო აქციებს უკრაინაში სახელმწიფო ძალაუფლების ხელში ჩაგდების მიზნით მართავდა.

9 დეკმებრს მეორედ დაკავების შემდეგ მიხეილ სააკაშვილმა შიმშილობა დაიწყო. დაკავებიდან მეორე დღეს კიევში პეტრო პოროშენკოს იმპიჩმენტისა და სააკაშვილის მხარდასაჭერი მარში გაიმართა.

პირველად კი ის 5 დეკემბერს დააკავეს. 5 დეკემბრის დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

სახურავზე ყოფნისას, სააკაშვილი უკრაინის მოსახლეობას მოუწოდებდა, რომ ქუჩაში გამოსულიყო და ამ უსამართლობას წინ აღდგომოდა. ამ მოწოდების შემდეგ, სააკაშვილის ბინასთან მისი მხარდამჭერები შეიკრიბნენ და სპეცრაზმის ავტომობილიდან დაიხსნეს. საქართველოს მესამე პრეზიდენტი 5 დეკემბრის შემდეგ კიევის ცენტრში, კარვების ქალაქში იმყოფებოდა, მასზე კი ძებნა იყო გამოცხადებული.

უკრაინის ხელისუფლების ცნობით, სააკაშვილის ბინაში ჩხრეკა მის მიერ ორგანიზებული მიტინგების წინა ხელისუფების მიერ დაფინანსებას უკავშირდება. სააკაშვილი ბრალდებებს აბსურდულს უწოდებს.