საქართველოს ყოფილმა პრეზიდენტმა და უკრაინის ოპოზციის ლიდერმა, მიხეილ სააკაშვილმა მეორედ დაკავების შემდეგ შიმშილობა დაიწყო. ამის შესახებ ინფორმაცია სააკაშვილის ფეისბუკის ოფიციალურ გვერდზე გამოქვეყნდა.

"ისინი ძალიან სუსტები არიან და იციან ეს, ამიტომ ეშინიათ ასე ძალიან", - წერის სააკაშვილის ოფიციალურ ფეისბუკზე.

მისივე სახელით, ხვალ, 10 დეკემბერს, მხარდამჭერების აქციაზე მისვლისკენ მოუწოდებენ.

მიხეილ სააკაშვილი უკრაინაში მეორედ რამდენიმე საათის წინ დააკავეს. პირველად კი ის 5 დეკემბერს დააკავეს. 5 დეკემბრის დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

სახურავზე ყოფნისას, სააკაშვილი უკრაინის მოსახლეობას მოუწოდებდა, რომ ქუჩაში გამოსულიყო და ამ უსამართლობას წინ აღდგომოდა. ამ მოწოდების შემდეგ, სააკაშვილის ბინასთან მისი მხარდამჭერები შეიკრიბნენ და სპეცრაზმის ავტომობილიდან დაიხსნეს. საქართველოს მესამე პრეზიდენტი 5 დეკემბრის შემდეგ კიევის ცენტრში, კარვების ქალაქში იმყოფებოდა, მასზე კი ძებნა იყო გამოცხადებული.

უკრაინის ხელისუფლების ცნობით, სააკაშვილის ბინაში ჩხრეკა მის მიერ ორგანიზებული მიტინგების წინა ხელისუფების მიერ დაფინანსებას უკავშირდება. სააკაშვილი ბრალდებებს აბსურდულს უწოდებს.