ხმაური გამარჯვებისთვის - ასე ჰქვია აქციას, რომლის მონაწილეებიც ამ წუთებში თბილისში, ვარდების მოედანზე, იკრიბებიან. აქციის ორგანიზატორი თეთრი ხმაურის მოძრაობაა, მათ სურთ სახელმწიფომ ნარკოპოლიტიკის მიმართ მიდგომა შეცვალოს და საქართველოს პარლამენტმა წარდგენილი კანონპროექტი უცვლელი სახით მიიღოს.

აქციაზე უკვე შეკრებილია რამდენიმე ასეული ადამიანი.

"ჩვენ არ დავუშვებთ ფასადურ ცვლილებებს, აღარ დავუშვებთ, გვდევნიდნენ და გვართმევდნენ მომავალს, გვძარცვავდნენ და ჩვენივე თანხებს ჩვენსავე წინააღმდეგ იყენებდნენ, გვაიძულებდნენ დასმენას და გვართმევდნენ ნდობასა და ურთიერთობებს. აღარ დავუშვებთ, რომ პოლიციური ტერორით გვიკლავდნენ თანამოქალაქეებს. სახელმწიფო ვალშია ჩვენთან!
და კანონპროექტის უცვლელად მიღება არა ხელისუფალის კეთილი ნება, არამედ ვალდებულებაა", - აღნიშნავენ ორგანიზაციაში.

30 ნოემბერს საქართველოს საკონსტიტუციო სასამართლომ ახალი გადაწყვეტილება მიიღო, რომლის მიხედვითაც, პირს მარიხუანის მოხმარებისთვის სისხლისსამართლებრივი პასუხისმგებლობა აღარ დაეკისრება.