ნარკოპოლიტიკის რეფორმის მხარდამჭერი ორგანიზაციები კანონპროექტის კენჭისყრაზე დაყენებას ითხოვს. 28 ნოემბერს დანიშნული იყო ნარკოპოლიტიკის რეფორმის საკანონმდებლო პაკეტის პირველი განხილვა სამი კომიტეტის გაერთიანებულ სხდომაზე. წინა დღით, გვიან ღამით ცნობილი გახდა, რომ საკომიტეტო განხილვა გაუქმდა.

პლატფორმის თქმით, განხილვის გაუქმების მიზეზი მათ მედიიდან გაიგეს:

"განათლების კომიტეტის თავმჯდომარე კომიტეტის გაუქმებას კანონპროექტზე პოზიციების შეუჯერებლობას უკავშირებს, რაც ჩვენთვის გაუგებარი და საგანგაშოა".

ნარკოპოლიტიკის ეროვნული პლატფორმის განცხადებით, კანონპროექტის ინიცირების დღიდან ის ცდილობდა პოზიციების დაახლოებასა და რიგ მნიშვნელოვან საკითხებზე დათმობეზე წავიდა, რათა მიღწეული ყოფილიყო შეთანხმება და საპარლამენტო განხილვების პროცესი დაბრკოლებების გარეშე დროულად დასრულებულიყო:

"პარლამენტის მხრიდან გუშინ მიღებული გადაწყვეტილება კიდევ ერთხელ გვაფიქრებინებს, რომ ხელისუფლება ვერ ხედავს რეფორმის სასიცოცხლო მნიშვნელობას, მოგვიწოდებს ვიყოთ მოქნილები როგორც რეფორმის შინაარსში ასევე ფორმატში, თავად კი არ მიყვება გაცხადებულ გეგმებს და დაპირებებს, რაც პროცესის უსამართლობაზე მიუთითებს".

პლატფორმის განმარტებით, ისინი ვერ ხედავენ საკანონმდებლო განხილვების გადავადების საფუძველს.