"აღმოსავლეთ პარტნიორობის შემდგომი წარმატების წინაპირობაა რეფორმები, რომელიც პარტნიორ ქვეყნებში მიმდინარეობს", - გერმანიის ევროპის საქმეთა სახელმწიფო მინისტრი მიხაილ როთი და საგარეო საქმეთა მინისტრი მიხეილ ჯანელიძე ბრიუსელის სამიტის დღეს გამოცემა Euroactive-ში ერთობლივ ოპედს აქვეყნებენ.

"ჩვენ უნდა შევახსენოთ ჩვენს თავს, რომ "აღმოსავლეთ პარტნიორობის" მიზანი ფუნდამენტური ღირებულებების მხარდაჭერაა, რომელსაც ვიზიარებთ - დემოკრატია, კანონის უზენაესობა, ადამიანის უფლებები და ეკონომიკური განვითარება ევროკავშირის სამეზობლოში. ეს უკავშირდება საზოგადოებების ტრანსფორმაციას", - ნათქვამია ერთობლივ ოპედ-ში.

აღმოსავლეთ პარტნიორობის შედეგები

მინისტრების შეფასებით "აღმოსავლეთ პარტნიორობა" კონკრეტულ შედეგებზე უნდა იყოს კონცენტრირებული:

"აუცილებლად უნდა გავცეთ დამაჯერებელი პასუხი შეკითხვას - რა არის შემდეგი "აღმოსავლეთ პარტნიორობაში?" დღესვე შეგვიძლია დავიწყოთ მთელი რიგი ერთობლივი პროექტების განხორციელება. სატრანსპორტო და ენერგეტიკული კომუნიკაციების სფეროში მეტი ინვესტიცია ყველასათვის სარგებლის მომტანია. მიმზიდველად ჟღერს დისკუსიები როუმინგის ტარიფების გაუქმებისა და ევროკავშირის ერთიან ციფრულ ბაზარზე შესვლის შესახებ. ევროკავშირის ერთიან ბაზართან დასაახლოვებლად მაღალი სიხშირის გადამცემების შექმნა შეიძლება კიდევ ერთი მნიშვნელოვანი გზავნილი იყოს. რატომაც არ უნდა განვიხილოთ უფრო მეტად შეთანხმებული საერთო ძალისხმევის განხორციელება კერძო სექტორის თანამშრომლობის კუთხით, განსაკუთრებით კი მცირე და საშუალო საწარმოებისა და კვალიფიციური პროფესიონალების ევროკავშირის შრომით ბაზარზე გამარტივებული წვდომის საკითხები. უფრო მჭიდრო თანამშრომლობა ორგანიზებული დანაშაულის წინააღმდეგ ბრძოლასა და უსაფრთხოების სხვა საკითხებზე ყველასათვის უფრო მეტი სტაბილურობის მომტანი იქნება", - ნათქვამია მინისტრების ერთობლივ სტატიაში.

აღმოსავლეთ პარტნიორობის 5 ინიციატივა

"აღმოსავლეთ პარტნიორობა“ მხოლოდ მაშინ იქნება წარმატებული, თუ ხალხი იგრძნობს და დაიჯერებს მის პოზიტიურ შედეგებს და დაინახავს კონკრეტულ გაუმჯობესებას ყოველდღიურ ცხოვრებაში. ჩვენი მოლოდინია, რომ ჩვენი საერთო მომავალი ერთიან ევროპაშია".

მინისტრების საგაზეთო პუბლიკაციაში 5 ინიციატივას გამოყოფენ, რომელმაც აღმოსავლეთ პარტნიორობის ფორმატი უფრო მეტად წარმატებული უნდა გახადოს:

  • ბრძოლა კორუფციის წინააღმდეგ;
  • სასამართლო რეფორმა;
  • საინვესტიციო კლიმატის გაუმჯობესება;
  • ახალი სამუშაო ადგილების შექმნა;
  • საგანმანათლებლო სისტემების გაუმჯობესება.

"გადაწყვეტილების მიღებისა და იმპლემენტაციის პროცესში უფრო მეტად უნდა ჩავრთოთ მმართველობის ადგილობრივი დონეები, რადგან ისინი ბევრად უფრო ახლოს დგანან ხალხთან და მათ საჭიროებებთან" - აღნიშნავენ მინისტრები.