სამი ოსკარის მფლობელი მსახიობი მერილ სტრიპი, ნიუ-იორკში, საერთაშორისო პრესის თავისუფლებასთან დაკავშირებულ შეხვედრაზე სიტყვით გამოვიდა, სადაც ჰოლივუდში ბოლო დროის ყველაზე გახმაურებულ თემას - სექსუალურ შევიწროებას შეეხო.

ლეგენდარულმა მსახიობმა გაიხსენა ის ორი შემთხვევა, როდესაც მასზე ფიზიკურად და ფსიქოლოგიურად იძალადეს.

"ჩემს ცხოვრებაში ორჯერ ვიყავი საშინელი ფიზიკური ძალადობის მსხვერპლი. ერთხელ პირადად ჩემზე მოიტანეს იერიში, მეორედ კი მაშინ, როდესაც სხვისი დაცვა ვცადე. ამ ამბით ცხოვრებაზე რაღაც ახალი ვისწავლე, შევიტყვე თუ რას ნიშნავს ნამდვილი ტერორი, მაშინ ჩემი პიროვნება მნიშვნელოვნად შეიცვალა და დავიწყე ფიქრი იმაზე, რაც მანამდე აზრადაც არ მომსვლია. გამიმართლა, რომ მაშინ ჩემმა ინსტიქტებმა გადამარჩინა", - თქვა სტრიპმა.

მსახიობს სიტყვით გამოსვლის დროს კონკრეტული სახელები და გვარები არ დაუსახელებია, თუმცა აღნიშნა, რომ ერთ-ერთი შემთხვევის მომსწრე მომღერალი და მსახიობი შერია, რომელმაც ის გადაარჩინა.

მერილ სტრიპმა მადლობა გადაუხადა ჟურნალისტებს სითამამისთვის და აღნიშნა, თუ რამდენად მნიშვნელოვანია მათი ჩართულობა ყოველგვარი ძალადობის დაძლევაში.