საქართველოს პრემიერი გიორგი კვირიკაშვილი ბრიტანეთის რეფერენდუმს ეხმაურება. პრემიერ მინისტრის თქმით, გუშინდელი რეფერენდუმი ვერ შეცვლის იმას, რომ ევროკავშირი ყველაზე მნიშვნელოვანი და ძლიერი პოლიტიკური და ეკონომიკური კავშირია მსოფლიოში. მისივე თქმით, კავშირის ძალაუფლება კიდევ უფრო გაიზრდება:

"გუშინ ბრიტანელთა უმრავლესობამ ხმა მისცა ევროკავშირიდან ქვეყნის გასვლას. ეს არის დემოკრატიული გადაწყვეტილება, რომელსაც პატივი უნდა ვცეთ, თუმცა პირადად მე ვუერთდები ჩვენი კონტინენტის იმ ლიდერებს, რომლებიც სინანულს გამოთქვამენ ამასთან დაკავშირებით. მეორე მხრივ, მნიშვნელოვანია, გვახსოვდეს, რომ მშვიდობისა და თანამშრომლობის ევროპულ პროექტს ალტერნატივა არა აქვს და ის აუცილებლად გაგრძელდება".

კვირიკაშვილის თქმით, ეს პროცესი უფრო მეტად გააძლიერებს ევროკავშირს და საშუალებას მისცემს კიდევ უფრო მეტად გამოიყენოს თავისი ძლიერი მხარეები:

"იმედის თვალით შევყურებ მომდევნო თვეებს, როცა ევროკავშირი შეასრულებს ისეთი ძლიერი ლიდერის როლს სამეზობლოში, როგორც ეს მსოფლიოში მის კუთვნილ ადგილს შეეფერება. ამავე დროს, ვთვლი, რომ გაერთიანებული სამეფო მომავალშიც შეიტანს მნიშვნელოვან წვლილს ევროპის უსაფრთხოებისა და განვითარების საქმეში".