ოზურგეთის მერობის დამოუკიდებელი კანდიდატის, კონსტანტინე შარაშენიძის შტაბი ხელისუფლებას არჩევნების მეორე ტურის გაყალბების მზადებაში ადანაშაულებს. სახელისუფლებო პარტიის მიმართ ბრალდებების შესახებ პრესკონფერენცია მერობის კანდიდატმა და შტაბის წევრებმა დღეს, 11 ნოემბერს, არჩევნებამდე ერთი დღით ადრე გამართეს.

შარაშენიძე ამბობს, რომ მას დოკუმენტებით დადასტურებული ინფორმაცია აქვს იმ სქემის შესახებ, რომლითაც არჩევნების მეორე ტურის გაყალბება იგეგემება.

"ჩამოიყვანეს სპეციალური ჯგუფები, შკოდებით, ტოიოტებით, სხვადასხვა სპორტსმენი. რა უნდათ, კორცხელის განმეორება, თუ უარესი?" - განაცხადა მერობის დამოუკიდებელი კანდიდატის შტაბის წევრმა, შოთა გოგიბერიძემ.

ამავე შტაბის კიდევ ერთი წევრი ამბობს, რომ მეორე ტურის გამართვისას არჩევნების ჩასაშლელად დაგეგმილია ჩხუბი და პროვოცირება იმ უბნებზე, სადაც შარაშენიძე გაიმარჯვებს.

მმართველი პარტიის წევრი, არჩილ თალაკვაძე ამბობს, რომ საზოგადოებრივი აზრის კვლევების შედეგების მიხედვით, მათი კანდიდატი, ბეგლარ სიორიძე არჩევნებს მოიგებს. მისი თქმით, ეს ინფორმაცია აქვთ კონკურენტებსაც და ამის გამო ტყუილების პროპაგანდა დაიწყეს.

შარაშენიძის შტაბის წევრებმა სახელისუფლებო პარტიის წევრები რამდენიმე დღის წინაც დაადანაშაულეს. რამდენიმე დღის წინ, 2017 წლის 8 ნოემბერს, ოზურგეთის მერობის დამოუკიდებელი კანდიდატის კონსტანტინე შარაშენიძის შტაბის ხელმძღვანელმა, ირაკლი სირაძემ, პრესკონფერენციაზე განაცხადა, რომ მათი კანდიდატის წარმომადგენელს, გიორგი როყვას დაემუქრნენ და დააშანტაჟეს. დამოუკიდებელი კანდიდატის შტაბის ხელმძღვანელმა შესაბამისი შინაარსის მოკლე ტექსტური შეტყობინებებიც გაასაჯაროვა.

შეტყობინებების მიხედვით, ირაკლი სირაძეს ბეგლარ სიორიძის მხარდამჭერებისთვის უნდა დაედასტურებინა, რომ გიორგი როყვა კონსტანტინე შარაშენიძის წარმომადგენელი არ ყოფილა.

რამდენიმედღიანი გაუჩინარების შემდეგ გიორგი როყვა სამართალდამცავ უწყებაში გამოიკითხა, მოგვიანებით კი ჟურნალისტებთან აღნიშნა, რომ მის მიმართ ზეწოლა არ ყოფილა და შეტყობინებები ირაკლი სირაძისათვის არ გაუგზავნია.