საბერძნეთში, კუნძულ კრეტაზე დასრულებულ მოჭადრაკეთა ევროპის გუნდურ ჩემპიონატზე, საქართველოს ქალთა ნაკრებმა მეორე საპრიზო ადგილი დაიკავა.

სპორტის სამინისტროს განცხადებით, ქართველმა ქალებმა 9 შეხვედრიდან 7 მოიგეს და 14 ქულით ვერცხლის მედლების მფლობელები გახდნენ.

დასკვნით ტურში ქალთა გუნდმა იტალიის ნაკრების დამარცხება შეძლო - 3.5:0.5. პირველი ადგილი 17 ქულით რუსეთის ქალთა ნაკრებმა დაიკავა, ხოლო მესამე პოზიციაზე 13 ქულით უკრაინის გუნდი გავიდა.

საქართველოს ჭადრაკის ფედერაციის ოფიციალური ვებ-საიტის ცნობით, ქალთა ნაკრების წევრებმა პირად დაფებზეც წარმატებით ითამაშეს: ბელა ხოტენაშვილმა და სალომე მელიამ ინდივიდუალურ დაფებზე ოქროს მედლები მოიპოვეს, ლელა ჯავახიშვილმა კი ვერცხლის მედალი.