86 წლის ასაკში ქართველი პოეტი ჯანსუღ ჩარკვიანი გარდაიცვალა. რუსთავი 2-ის ინფორმაციით, ის ინსულტის დიაგნოზით რეანიმაციულ განყოფილებაში აგვისტოს თვეში მოათავსეს.

ჯანსუღ ჩარკვიანის პირველი ლექსი 1947 წელს გამოქვეყნდა. 1959 წელს გამოვიდა პოეტის პირველი წიგნი "ერთი ღამის სიჩუმეში".

ასევე, გამოცემული აქვს წიგნები: "რწმენის კედელი", "დიდი ნათელი", "ერთტომეული" და ა.შ. პოეტის ლექსები თარგმნილია მრავალ ენაზე. ჩარკვიანი იყო მწერალთა კავშირის გამგეობის პრეზიდიუმის წევრი, საქართველოს მწერალთა კავშირის მდივანი, გამომცემლობა "საბჭოთა საქართველოს" დირექტორი და საზოგადოება "თბილისელის" პრეზიდენტი.

სხვადასხვა დროს მას მინიჭებული აქვს გალაკტიონ ტაბიძის სახელობის პრემია და შოთა რუსთაველის სახელობის სახელმწიფო პრემია. 1998 წელს მიიღო შალვა დადიანის ლიტერატურული პრემია. ასევე, ის იყო ღირსების ორდენის კავალერი. თბილისის საპატიო მოქალაქის წოდება მიენიჭა 1996 წელს. 1995 და 1999 წლებში იყო საქართველოს პარლამენტის ორი მოწვევის დეპუტატი.